Angliyalik mutaxassis Frenk Lempard Londonning “Chelsi” jamoasi bosh murabbiyiga aylandi. Bu haqida “aristokratlar” rasmiy sayti ma’lum qildi.
Lempard “Chelsi”da yaqinda iste’foga chiqarilgan Grem Potter o‘rnini egalladi. Frenk mavsum oxiriga qadar jamoa murabbiyi sifatida ishlaydi. Shuningdek, Eshli Koul, Jo Edvards va Kris Jonslar murabbiylar shtabidan joy oladi.
Qayd etib o‘tish joiz, londonliklarni joriy mavsum uchinchi murabbiy boshqarib boradi. 2022/23-yilgi mavsum boshida Tomas Tuxel jamoa murabbiyi bo‘lgan bo‘lsa, uning o‘rnini sentabr oyida Potter egalladi. Oradan 7 oy o‘tib, Frenk Lempard “Chelsi” boshqaruviga keldi.
Eslatib o‘tamiz, Frenk Lempard faoliyatida ikkinchi bor “Chelsi” bosh murabbiyi sifatida ishlaydi. Bunga qadar 44 yoshli murabbiy 2019-yildan 2021-yilga qadar “aristokratlar” murabbiyi bo‘lgan.
Angliyalik mutaxassis futbolchilik faoliyati davomida 2001-yildan 2014-yilga qadar “aristokratlar” safida to‘p surgan. U London klubi tarkibida umumiy hisobda 648 ta uchrashuv o‘tkazib, 211 ta gol urgandi va klub tarixida eng yaxshi to‘purarga aylangan.
Izoh (0)