Surxondaryo viloyati Denov tumanida 0,9 gektar yerni qariyb 350 mln so‘mga sotmoqchi bo‘lgan shaxs ushlandi. Bu haqda Bosh prokuratura axborot xizmati xabar berdi.
Xabarga ko‘ra, fuqaro R.X.ning viloyat IIB JQB Yer resurslari talon-toroj qilinishiga qarshi kurashish bo‘linmasiga qilgan murojaatiga asosan, viloyat prokuraturasi bilan hamkorlikda tezkor tadbir o‘tkazildi.
Tadbir jarayonida fuqaro E.I. “Minora” mahallasi hududidagi o‘rmon xo‘jaligiga qarashli 0,90 gektar bo‘sh yer maydoni o‘ziga tegishli ekanini aytib, 349 million so‘mga sotishga kelishgani maʼlum bo‘lgan. U kelgusida mansabdor tanishlari orqali yer maydoniga oid hujjatlarni rasmiylashtirib berishni vaʼda qilib, kelishilgan puldan 140 million so‘mini ariza muallifidan olayotgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 168-moddasi bilan jinoyat ishi qo‘zg‘atilib, tergov harakatlari olib borishga kirishilgan.
Izoh (0)