Samarqand shahrida madaniy meros obyektining xarobaga aylanishiga sababchi bo‘lgan tadbirkor ozodlikdan mahrum etildi. Bu haqda Madaniy meros agentligi axborot xizmati xabar berdi.
Xabarga ko‘ra, 12-mart kuni ommaviy axborot vositalarida Samarqand shahri, Mironshoh ko‘chasi, 6-manzilda joylashgan xususiy mulkda bo‘lgan moddiy-madaniy meros obyektining avariya holatga kelib qolgani yuzasidan xabarlar tarqalgan. Mazkur xabarlar yuzasidan hududiy boshqarma tomonidan o‘rganish ishlari olib borildi.
Mazkur turar joy binosi 2019-yil 4-oktabrdagi Vazirlar Mahkamasi qarori bilan “Moddiy-madaniy merosning ko‘chmas mulk obyektlari Milliy ro‘yxatiga kiritilgan va mahalliy ahamiyatdagi moddiy-madaniy meros obyekti hisoblanadi. 2015-yil 10-dekabrda Mironshoh ko‘chasi 4-manzilda “Afrosiyob Xosiyat Begim Makoni” MCHJ tomonidan qurilish ishlari jarayonida og‘ir texnikalarning yurishi, 8-10 metrli kotlovan qazish va qurilish ishlarning olib borilishi natijasida madaniy meros obyektining devorlarida yoriqlar paydo bo‘lib, ayrim devorlar yiqilib tushgani aniqlangan.
Shu kunning o‘zida dalolatnoma rasmiylashtirilib, jarayonni to‘xtatish so‘ralgan. Shundan so‘ng xususiy tadbirkorga yana bir necha bor ogohlantirish berilishiga qaramasdan qurilish ishlari davom ettirilib kelingan va buning natijasida madaniy meros obyektiga yanada jiddiy zarar yetkazilgan.
Keltirilishicha, 2016-yil 1-iyul kuni madaniy meros obyektining texnik holati o‘rganilib, dalolatnoma tuzilgan va huquqni muhofaza qilivchi organlarga murojaat qilingan. Jinoyat ishlari bo‘yicha Samarqand shahar sudining hukmi bilan Mironshoh ko‘chasi 6-manzilda joylashgan madaniy meros obyektining qisman buzilib o‘ta og‘ir avariya holatiga kelib qolishiga sababchi bo‘lgan fuqaro O.R.ga nisbatan Jinoyat kodeksining 132-modda, 2-qismi bilan qonuniy chora ko‘rilgan.
Xususiy tadbirkor tomonidan turar joy binosiga yetkazilgan zarar oqibatida madaniy meros obyektining tarixiy, madaniy, badiiy ahamiyatiga jiddiy zarar yetkazilgan. Tarixiy mulkka nisbatan jiddiy zarar yetkazgani sababli tadbirkorga nisbatan ozodlikdan mahrum etish jazosi qo‘llanilgan. Hozirgi kunda hududiy boshqarma tomonidan avariya holatiga kelib qolgan obyektni asrab qolish yoki tarixiy ahamiyatini yoqotgan deb topish yuzasidan o‘rganish ishlari olib borilmoqda.
Avvalroq Samarqand shahri dunyo taniydigan megapolisga, xalqaro turizm va biznes markaziga aylantirilishi haqida xabar berilgandi.
Izoh (0)