O‘zbekistonda Avstriya va Germaniyaga migrantlarni tayyorlash va malakasini oshirish markazi tashkil etilishi kutilmoqda

O‘zbekistonda Avstriya hamda Germaniya mehnat bozorlarida ishga joylashtirish uchun Avstriya andozalariga muvofiq mehnat migrantlarini tayyorlash va malakasini oshirish markazini tashkil etish rejalashtirilmoqda. Bu haqda “Dunyo” AA xabar berdi.

Ma’lum qilinishicha, ushbu masala O‘zbekiston Bandlik va kambag‘allikni qisqartirish vazirligi hamda Avstriyaning eee Austria kompaniyasi vakillari o‘rtasidagi onlayn uchrashuvda atroflicha ko‘rib chiqildi.

Muzokaralar doirasida “Monomarkazlarni modernizatsiya qilish hamda mahalliy va Avstriya mehnat bozori uchun mehnat muhojirlarini tayyorlashda kasb-hunar ta’limi dasturlarini izchil tatbiq etish” bo‘yicha loyihani amalga oshirishning istiqbollari muhokama qilingan.

Onlayn uchrashuv davomida O‘zbekiston tomonidan markazda tegishli ta’limni olganlaridan so‘ng Respublika fuqarolarining Avstriya mehnat bozorida ularning bandligini ta’minlash masalasiga alohida e’tibor qaratildi.

Loyiha doirasida Avstriyaning yetakchi institutlari bilan yaqin ilmiy va amaliy aloqalarni o‘rnatish ham nazarda tutilgan.