“Ozodlik” O‘zbekistonning gaz sohasidagi kelishuvlari bo‘yicha taniqli siyosatshunos Kamoliddin Rabbimov bilan uyushtirgan suhbatda, Rabbimov O‘zbekistonning barcha konlari 35 yilga Rossiyaga berib yuborilgani haqidagi iddaolar noto‘g‘ri ma'lumot ekanini aytib o‘tdi.
"Biz ikki vazir bilan gaplashdik. O‘zbekistonda ishlab turgan jami konlarning soni 294 ta, shundan 176 tasi qo‘shma korxona. Demak, aksariyat konlar O‘zbekistonning o‘z qo‘lida, ularga hech qanday tashqi investor, tashqi davlat aralashmaydi. 176 ta kondan 13 tasi "Lukoyl" bilan, 2 taginasi “Gazprom” bilan — hammasi bo‘lib 15 tagina uchastka Rossiya bilan birga. Ulardan bittaginasi M-25 — “Mustaqillik 25” 35 yilga berilgan. Boshqa birorta kon 35 yilga Rossiyaga berilmagan. Biz savol berdik, vazirlar bizga juda ham jiddiy javob berishdi, endi vazirlar aldamasa kerak.
Bizga hujjatlarni bittama-bitta ko‘rsatishdi. Ikki vazir ham katta papkalarda hujjatlar bilan kelishdi. O‘zlari seyflaridan ochib, yopiq kontraktlarni olib kelib ko‘rsatishdi.
Men aytmoqchi bo‘lganim, odamlar “Ozodlik”ning efiridan 35 yilga butun O‘zbekistonning gaz va neft resurslari qo‘ldan ketdi, degan xulosaga keladi. 294 ta kondan ikki emas, uch emas, faqat bittasi haqida gap ketyapti, xolos. Agar men hozir noto‘g‘ri gapirsam, bunga vazirlar javob berishi kerak, xalqni aldagan bo‘ladi. Bu yerda yoki “Ozodlik” tomonidan xato o‘tyapti, yoki vazirlar ongli ravishda manipulyatsiya qilayotgan bo‘ladi. Ikkalasidan bittasi, boshqa gap yo‘q bu yerda.
Vazirlar bizga hatto uchastkalarni ham ko‘rsatdi, u yerga, ularning aytishicha, O‘zbekiston budjetidan bir tiyin kiritilmaydi. Yerlar O‘zbekistonniki. Uning ostidagi gaz yoki neft ham O‘zbekistonniki. Uni investorlarga, ayniqsa, xorijiy investorlarga — British Petrolium, Total va boshqalarga taklif qilgan. Vazirlar aytyaptiki, bu xorijiy kompaniyalar bunaqangi kichik hududga, kichik hajmga va kichik foizga kelmaydi.
Men mutaxassis emasman, lekin tushunishga harakat qildim. Baʼzilarida bitta qobiq bo‘lib turadi, bitta quvur tiqsangiz chiqaveradi. Baʼzilarida qavat-qavat bo‘ladi va bitta hududdagi gazga bir nechta joydan quvur qazish kerak, shunaqa joylari bor. Men tasavvur qilyapman, O‘zbekistondagi uchastkalarning hajmi har xil, lekin 35 yil faqat bitta uchastka haqida gap ketyapti" - dedi Kamoliddin Rabbimov.
Izoh (0)