“Асосланмаган ва ишончсиз маълумотларни халқаро омма ихтиёрига ҳавола этиш одамларни манипуляция қилиш, дея баҳоланади” — Кушербаев “Озодлик” “суриштируви” ҳақида

Собиқ депутат, айни пайтда табиат ресурслари вазирининг маслаҳатчиси Расул Кушербаев “Озодлик”нинг Ўзбекистон нефть ва газ конлари бўйича суриштирувига муносабат билдирди.

“Тўғрисини айтаман “Озодлик”нинг Ўзбекистон нефть ва газ конлари бўйича суриштирувини кўрганимда анча таъсирландим. Наҳотки, шу маълумотлар рост бўлса, деган савол ўйлантирди. Лекин Ўзбекистон расмийлари, соҳага масъул ташкилотлар нима деркин, деб кутдим. Агар расмийлар бу масалада жимлик сақласа демак бу маълумотлар рост, деган фикрга борардим”, — дейди Кушербаев.

Собиқ депутат Энергетика вазирлиги , “Ўзбекнефтгаз” компанияси томонидан берилган муносабатлар, журналист ва блогерларнинг фикри қолаверса, масъул ташкилотлар томонидан кўрсатилган далиллардан сўнг “Озодлик” иккита жиддий хатоликка йўл қўйган деб ҳисобламоқда.

“Биринчиси, Ўзбекистоннинг бутун газ ва нефть конларини барча ҳуқуқлар билан 35 йилга битта компанияга бериши ва 35 миллиард АҚШ доллари бир шахсга тегишли корхонага (Eriell, Enter Engineering) ишлатилган деган иддао нотўғри бўлиб чиқди. Ушбу айбловларни илгари сурган “Озодлик” ижодкорларида агар Ўзбекистон расмийлари кўрсатган далиллардан кучли исботлар бўлса буни кўрсатиши керак. Агар бундай далил бўлмаса, хатога йўл қўйилгани тан олиниши керак. Бу ҳам оммавий ахборот воситаларининг муносиб позицияси бўлади. Иккинчи, Ўзбекистон расмийлари билдирган норматив ҳужжатлар қандайдир корхоналарнинг бухгалтерлик  ҳужжатларидан кўра ишонарли чиқди. Ва энг муҳими барча келишувлар рўй рост айтилди. Суриштирувдан аввал мана шу эҳтимолий аргументлар инобатга олиниши керак эди”, — дейди Кушербаев.

Унинг қайд этишича, “Озодлик”нинг суриштируви чуқур асосланмаган иддаолар билан оммага ахборот тарқатишга бўлган уринишга ўхшаб туюлмоқда. Бу ишдан мақсад нима экани тушунарсизлигича қолди.

“Нима бўлганда ҳам бир шахс ёки бир гуруҳ эмас, бутун мамлакат ҳаёти билан боғлиқ маълумот тарқатишдан олдин унинг оқибати қандай бўлишини инобатга олган ҳолда, ҳар томонлама асосли фактларга таянилиши керак.

Айни ўринда ушбу материал том маънода Ўзбекистон халқини жунбушга келтириши мумкин. Асосланмаган ва ишончсиз маълумотларни халқаро омма ихтиёрига ҳавола этиш эса одамларни манипуляция қилиш, дея баҳоланади”, — деб таъкидлади собиқ депутат.