“An-Nassr” klubi hujumchisi Krishtianu Ronaldu Saudiya Arabistoni chempionati doirasida “Al-Vahda”ga qarshi kechgan o‘yinda (4:0) to‘rtta gol urishga muvaffaq bo‘ldi
“Al-Vahda” darvozasiga kiritilgan birinchi to‘p Ronaldu uchun milliy birinchiliklardagi 500-gol bo‘ldi. Ushbu o‘yin yakunida Ronalduning ligalar doirasida urgan gollari soni 503 taga yetdi.
Ronalduning milliy ligalardagi gollari:
- La Liga (“Real”) — 311 ta gol
- APL (“Manchester Yunayted”) — 103
- A Seriya (“Yuventus”) — 81
- Saudiya ligasi (“An-Nassr”) — 5
- Primeyra (“Sporting”) — 3
Ronaldu faoliyatini davom ettirayotgan futbolchilar orasida bu borada yetakchi bo‘lib turibdi, umumiy ro‘yxatda esa — to‘rtinchi o‘rinda. “PSJ” forvardi Lionel Messi hisobida 490 ta gol mavjud.
Oliy divizionlarda gol urish bo‘yicha yetakchi Pele hisoblanadi. Braziliyalik afsona “Santos” (504) va “Nyu-York Kosmos” (37) safida jami 541 ta gol urgan. Keyingi o‘rinlardan Yozef Bitsan (518) va Ferens Pushkash (512) joy olgan.
Portugaliyalik futbolchi faoliyatidagi 61-het-trikni qayd etdi. Ularning 51 tasi klub miqyosida, yana 10 tasi terma jamoa safida kiritilgan. Ronaldu 30 yoshga qadar 30 marta bir o‘yinda 3 yoki undan ko‘p gol urgan, 30 yoshdan keyin esa 31 marta bu ishni uddaladi.
Faoliyatini davom ettirayotgan futbolchilar orasida Ronaldu het-triklar soni bo‘yicha yetakchilik qilmoqda. Eng yaqin ta’qibchi Lionel Messida 56 ta het-trik bor.
38 yoshli Ronaldu 2019-yildan keyin ilk bor va faoliyatida 11-marta poker qayd etishga erishdi. Bir o‘yinda 4+ gol urish bo‘yicha Ronaldu Messini (8) ortda qoldirmoqda. Shuningdek, har ikkisining hisobida ikkitadan penta-trik bor.
To‘rtta gol urganim va chempionatdagi gollarim sonini 500 taga yetkazib olganimdan juda xursandman. Bu gollar jamoamga g‘alaba keltirganidan mamnunman, — deydi Ronaldu o‘yindan keyin.
Yana bir fakt, Ronaldu Saudiya Arabistoni oliy divizionida het-trik (poker) qayd etishi uchun uchta o‘yin yetarli bo‘ldi. Bu musobaqa rekordi hisoblanadi.
Izoh (0)