Turkiya va Suriyada 6-fevral kuni yuz bergan zilzilalardan jabrlanganlarga sport olami vakillari ham o‘z yordam qo‘llarini cho‘zmoqda.
“PSJ” hujumchisi Lionel Messi Turkiya va Suriyadagi talafotlardan jabrlangan insonlarga yordam berish maqsadida 3,5 million yevro yuborgan.
Turkiyaning “Galatasaroy” klubi o‘z stadionida gumanitar yordam yig‘ish punktini ishga tushirdi. Ushbu ishlarda klubning qator futbolchilari ko‘ngilli sifatida yordam bermoqda. Xususan, jamoaning belgiyalik legioneri Dris Mertens ham jamoadoshlariga ko‘maklashyapti.
Shuningdek, “Istanbul Bashakshehir”, “Beshiktosh” va “Fenerbahche” klublari ham o‘z arenalarida ko‘ngillilar uchun xayriya buyumlari yig‘ish punktlarini tashkil qilgan.
“Istanbul” klubi yarim himoyachisi Mesut O‘zil volontyorlik ishlarida faol qatnashmoqda. Futbolchi o‘z Twitter sahifasida “Birgalikda qiyin vaziyatlarni yengib o‘tish mumkin”, — deya izoh qoldirgan.
Portugaliyaning “Benfika” jamoasi Lissabondagi Turkiya elchixonasiga 1000 dona termoyopinchiq yuborgan.
“Atalanta”ning turkiyalik futbolchi Merix Demiral “Yuventus”dagi sobiq jamoadoshlari Krishtianu Ronaldu, Paulo Dibala va Leonardo Bonuchchining libosini kimoshdi savdosiga qo‘yib, tushgan pullarni xayriyaga yo‘lladi.
Uch futbolchining libosi jami 5 million liraga (250 ming yevro) sotilgan. Shuningdek, Demiral “Atletiko” hujumchilari Antuan Grizmann va Alvaro Morata ham o‘z imzolari tushirilgan liboslarini taqdim etishga rozi bo‘lgani va ular auksionga qo‘yilganini ma’lum qildi.
“Men Krishtianu bilan gaplashdim. U Turkiyada sodir bo‘lgan hodisalardan chuqur qayg‘uda. Biz kolleksiyamda turgan Ronalduning imzosi tushirilgan libosni kimoshdi savdosiga qo‘yamiz. Undan kelib tushgan pullar esa zilzila bo‘lgan hududlardagi insonlarga yetkaziladi”, — deb yozadi Demiral o‘z sahifasida.
Kelib chiqishi turk bo‘lgan germaniyalik futbolchi Ilkay Gundo‘g‘an zilziladan jabr chekkanlarga ikkita yuk mashinasida yegulik yuborgan. Shuningdek, “Manchester Siti” futbolchisi yana qo‘shimcha yordam yuborilishini ma’lum qilgan.
Bizning bor o‘y-xayollarimiz ayni vaqtda falokat yuz bergan hududlarda bo‘lib turgan odamlarda. Hozir hamma birlikda harakat qilishi muhim. Odamlar bizning yordamga muhtoj. Ayni vaqtda biz qo‘shimcha oziq-ovqat, bolalar ozuqasi, yopinchiq, gigiyena vositalari va issiq kiyim yig‘ishga harakat qilyapmiz. Shundan keyin ularni Turkiyaga jo‘natishni tashkil qilamiz, — deydi Gundo‘g‘an.
Turkiya futbol federatsiyasi ham jabrlanganlarga 20 million lira (1 million dollar) xayriya qildi.
“Bizning qalbimiz vayronalar ostidan olib chiqilayotgan va olib chiqilishini kutayotgan birodarlarimiz bilan birga. Butun Turkiyaning fikr-u xayoli jabr chekkanlarda.
Biz xayriya kompaniyasini boshlayapmiz va 20 million lirani falokatdan aziyat chekkanlarga yuboramiz. Mamlakatda so‘nggi paytlarda yuz bergan eng katta ofatlardan biri bo‘lgan ushbu zilzila jarohatlarini birgalikda davolashimizga ishonamiz.
Barcha terma jamoa a’zolarini, klublarni va ularning rahbarlarini, barcha futbolchilarni, murabbiylarni, hakamlar-u muxlislarni xayriya aksiyamizni qo‘llab-quvvatlashga chaqiramiz”, — deyiladi Turkiya futbol federatsiyasi bayonotida.
6-fevral kuni Turkiyaning janubi-sharqiy qismida 7,7 magnitudali zilzila sodir bo‘ldi. yer qimirlashlari oqibatida Turkiya va Suriya qator viloyatlaridagi uylar vayronaga aylandi. Turkiya prezidenti Rajab Toyyib Erdo‘g‘on mamlakatda 7 kunlik milliy motam e’lon qildi, tabiiy ofatdan jabr ko‘rgan o‘nta viloyatda 90 kunlik favqulodda holat joriy etildi.
So‘nggi xabarlarga ko‘ra, Turkiyada tabiiy ofatdan halok bo‘lganlar soni 17 674 nafarga, jarohatlanganlar soni 72 879 nafarga yetdi. Suriyada esa kamida 3 377 kishi halok bo‘ldi, jarohatlanganlarning umumiy soni 21 051 nafarga yetgan.
Izoh (0)