“Ан-Насср” клуби ҳужумчиси Криштиану Роналду Саудия Арабистони чемпионати доирасида “Ал-Ваҳда”га қарши кечган ўйинда (4:0) тўртта гол уришга муваффақ бўлди
“Ал-Ваҳда” дарвозасига киритилган биринчи тўп Роналду учун миллий биринчиликлардаги 500-гол бўлди. Ушбу ўйин якунида Роналдунинг лигалар доирасида урган голлари сони 503 тага етди.
Роналдунинг миллий лигалардаги голлари:
- Ла Лига (“Реал”) — 311 та гол
- АПЛ (“Манчестер Юнайтед”) — 103
- А Серия (“Ювентус”) — 81
- Саудия лигаси (“Ан-Насср”) — 5
- Примейра (“Спортинг”) — 3
Роналду фаолиятини давом эттираётган футболчилар орасида бу борада етакчи бўлиб турибди, умумий рўйхатда эса — тўртинчи ўринда. “ПСЖ” форварди Лионель Месси ҳисобида 490 та гол мавжуд.
Олий дивизионларда гол уриш бўйича етакчи Пеле ҳисобланади. Бразилиялик афсона “Сантос” (504) ва “Нью-Йорк Космос” (37) сафида жами 541 та гол урган. Кейинги ўринлардан Ёзеф Бицан (518) ва Ференс Пушкаш (512) жой олган.
Португалиялик футболчи фаолиятидаги 61-ҳет-трикни қайд этди. Уларнинг 51 таси клуб миқёсида, яна 10 таси терма жамоа сафида киритилган. Роналду 30 ёшга қадар 30 марта бир ўйинда 3 ёки ундан кўп гол урган, 30 ёшдан кейин эса 31 марта бу ишни уддалади.
Фаолиятини давом эттираётган футболчилар орасида Роналду ҳет-триклар сони бўйича етакчилик қилмоқда. Энг яқин таъқибчи Лионель Мессида 56 та ҳет-трик бор.
38 ёшли Роналду 2019 йилдан кейин илк бор ва фаолиятида 11 марта покер қайд этишга эришди. Бир ўйинда 4+ гол уриш бўйича Роналду Мессини (8) ортда қолдирмоқда. Шунингдек, ҳар иккисининг ҳисобида иккитадан пента-трик бор.
Тўртта гол урганим ва чемпионатдаги голларим сонини 500 тага етказиб олганимдан жуда хурсандман. Бу голлар жамоамга ғалаба келтирганидан мамнунман, — дейди Роналду ўйиндан кейин.
Яна бир факт, Роналду Саудия Арабистони олий дивизионида ҳет-трик (покер) қайд этиши учун учта ўйин етарли бўлди. Бу мусобақа рекорди ҳисобланади.
Изоҳ (0)