Айни вақтда президент Шавкат Мирзиёев Жиззах шаҳрида саноатни ривожлантириш ва қайта тикланувчи энергия манбалари масалаларида йиғилиш ўтказмоқда. Бу ҳақда “Дарё” мухбири хабар берди.
Президент кўп йиллар иқтисодиёти пахтага қарам бўлган Жиззахни саноатлаштириш бўйича катта ислоҳотларни амалга оширилаётгани ҳақида гапирди.
“Биринчидан, вилоятда янги саноат корхоналари барпо қилиш учун, сўнгги олти йилда миллиардлаб доллар инвестиция жалб қилинди. Бунинг ҳисобига, 2 мингга яқин янги корхоналар ташкил қилиниб, ишлаб чиқариш ҳажми 1,9 бараварга ошди.
Олдин вилоятнинг саноат маҳсулоти асосан пахта толаси бўлган бўлса, ҳозирги кунда электротехника, оптик тола, автомобиль, мураккаб кимёвий моддалар, энерготежамкор материаллар каби юқори технологик маҳсулотлар ишлаб чиқарилмоқда”, — деди давлат раҳбари.
Шавкат Мирзиёев вилоятдаги саноат экспорти 1,8 баравар ошиб, 166 миллион долларга етганини айтди.
“Бугунги кунда, саноатда 54 минг аҳоли банд бўлиб, шундан 6,5 минг нафари юқори малакали мутахассислар ҳисобланади. Мисол учун, “Жиззах” эркин иқтисодий зонасида ҳозирги кунда 370 миллион долларлик 45 та лойиҳа амалга оширилмоқда.
Жиззах мисолида бир нарсани аниқ айтиш мумкин. Иқтисодиётимизни барқарор ривожлантириш, дунё бозорларига жадал кириб бориш ва юқори даромадли иш ўринларини яратиш, фақат ва фақат саноат орқали бўлади. Бу борада келгуси икки йилда Жиззахда автомобилсозлик ва металлургия соҳаларида йирик лойиҳалар ишга тушади”, — деди президент.
Изоҳ (0)