Braziliya va Argentina kelasi haftada umumiy valyuta yaratish bo‘yicha ish boshlanganini e’lon qiladi. Bu haqda Financial Times xabar berdi.
Nashrning yozishicha, Braziliya sur (janubiy) deb nomlashni taklif qilayotgan yangi valyuta mintaqaviy savdoni qanday rag‘batlantirib, dollarga qaramlikni kamaytirishiga e’tibor qaratilmoqda.
Argentina iqtisodiyot vaziri Serxio Massaga ko‘ra, yagona valyuta uchun zarur bo‘lgan parametrlarni o‘rganishni boshlash to‘g‘risida qaror qabul qilinadi. Keyinchalik Lotin Amerikasining boshqa davlatlari ham loyihaga qo‘shilishga taklif qilinadi.
Braziliyada asosiy valyuta real, Argentinada esa peso.
FT hisob-kitoblariga ko‘ra, butun Lotin Amerikasini qamrab olgan valyuta ittifoqi global yalpi ichki mahsulotning taxminan 5 foizini tashkil qiladi.
Dunyoning eng yirik valyuta ittifoqi Yevrohududda dollar hisobida jahon yalpi ichki mahsulotining taxminan 14 foizini tashkil qiladi. Biroq uni yaratish uchun Yevropaga 35 yil kerak bo‘lgan.
Braziliya va Argentina so‘nggi bir necha yil davomida umumiy valyuta yaratish masalasini muhokama qilgan. Biroq Braziliya Markaziy bankining qarshiligi tufayli muzokaralar muvaffaqiyatsizlikka uchragan.
Braziliya va Argentina o‘rtasidagi tovar ayirboshlash hajmi o‘tgan yilning birinchi 11 oyida 26,4 milliard dollarga yetdi. Bu 2021-yilning shu davriga nisbatan qariyb 21 foizga ko‘p.
Har ikki davlat Mercosur (Janubiy Amerika mamlakatlari umumiy bozori: Argentina, Braziliya, Urugvay, Paragvay va Venesuela) ning harakatlantiruvchi kuchi hisoblanadi.
FT ma’lumotlariga ko‘ra, yangi valyutaning jozibadorligi yillik inflyatsiya 100 foizga yaqinlashayotgan va Markaziy bank xarajatlarni moliyalashtirish uchun pul chop etayotgan Argentinada yaqqol namoyon bo‘ladi.
Rejaga ko‘ra, bu milliy pul birliklarini istisno qiladigan emas, balki ikki tomonlama savdo operatsiyalari uchun yaratilgan valyuta bo‘lishi kerak. O‘tgan yilning dekabr oyi oxirida bu muhokamalar qayta boshlangan.
Izoh (0)