2022-yilda O‘zbekistonga pul o‘tkazmalari rekord darajadagi 17 mlrd dollarga yetdi
2022-yilda O‘zbekistonga xorijdan pul o‘tkazmalari hajmi 2,1 barobarga oshib, 16,9 mlrd dollarni tashkil etdi. Bu haqda Markaziy bank raisi Mamarizo Nurmuratov ma’lum qildi.
Uning so‘zlariga ko‘ra, o‘tkazmalarning 85 foizi yoki qariyb 14,5 mlrd dollari Rossiya hissasiga to‘g‘ri keladi. Bu 2021-yilga nisbatan 2,6 barobar ko‘pdir.
Ma’lumotlarga ko‘ra, bu farq 2022-yil davomida Qirg‘iziston va Tojikistonda ma’lum miqdorda naqd valyuta taqchilligi yuzaga kelgani, shu sababli banklarda ayrim cheklovlar joriy etilgani bilan bog‘liq. Bunday sharoitda mazkur davlat fuqarolari O‘zbekistonga valyuta o‘tkazib, mamlakat banklari orqali naqd pul olib chiqqan.
Pul o‘tkazmalari oqimining ortishi fonida valyuta operatsiyalari ko‘rsatkichlari ham oshdi. Taklif hajmi talabdan 2,9 mlrd dollarga oshib, 2,5 milliard dollarni tashkil etdi.
Yanvar—dekabr oylarida banklar tomonidan aholidan 11,9 mlrd dollarlik valyuta xarid qilindi, bu 2021-yilga nisbatan 4,8 mlrd dollar yoki 1,7 barobar ko‘pdir.
Shu bilan birga, aholi 8,9 mlrd dollarga valyuta sotib oldi, bu 4,3 mlrd dollar yoki o‘tgan yilga nisbatan deyarli ikki barobar ko‘pdir.
O‘zbekistondan boshqa davlatlarga o‘tkazilgan pul o‘tkazmalari hajmi 29 foizga oshib, 2,1 milliard dollarni tashkil etdi. O‘zbekistonliklar asosan Turkiya, Xitoy, AQSH hamda Hindiston kabi mamlakatlarga pul o‘tkazmalarini amalga oshirgan. Regulyator raisining qayd etishicha, bu mamlakatlar qatorida deyarli o‘zgarish yo‘q.
2022-yil 3-chorak yakunlariga ko‘ra, Rossiyadan O‘zbekistonga pul oqimi ikki barobarga ko‘paygani ma’lum qilingandi. Shu davrda O‘zbekistonda pul o‘tkazmalari 2022-yilning 9 oyida 2,2 barobarga oshib, 12,6 mlrd dollarni tashkil qilgan.
2022-yilning dastlabki 6 oyida O‘zbekistonga 6,54 mlrd dollarlik pul o‘tkazmalari kelib tushgan edi. O‘sha paytda ham o‘sish ko‘rsatkichi 2,2 barobar bo‘lgan.
