Jinsiy zo‘ravonlikda gumonlangan “Manchester Yunayted” futbolchisi Meyson Grinvuddan barcha ayblar olib tashlandi
“Manchester Yunayted” hujumchisi Meyson Grinvuddan jinsiy zo‘ravonlik aybi olib tashlandi.
2022-yil yanvar oyida futbolchining qaylig‘i Harriyet Robson futbolchini zo‘ravonlikda ayblab, ijtimoiy tarmoq orqali qonagan labi va tanasidagi gematomalar tasvirlangan foto hamda videolarni e’lon qilgan. Shuningdek, qiz jinsiy aloqaga majburlanayotgani yozib olingan audioyozuvni ham e’lon qilgan. Shundan so‘ng Meyson o‘z uyida hibsga olingan edi.
Grinvud jinsiy zo‘ravonlik, o‘lim bilan tahdid qilishda gumon qilingan. 2022-yil 2-fevralda u garov evaziga ozod qilingandi. Iyun oyida esa garov evaziga ozod qilish muddati uzaytirilgandi.
2022-yil oktabr oyida Grinvud uni jinsiy zo‘ravonlikda ayblagan qiz bilan aloqaga chiqqani uchun yana hibsga olingan.
2-fevral kuni Manchester politsiyasi Grinvuddan barcha ayblar olib tashlanganini ma’lum qildi.
“21 yoshli yigitga nisbatan 2022-yil yanvar oyida boshlangan tergov ishi to‘xtatildi. Bu ish OAVda keng yoritilayotganini inobatga olib, u endi jinoiy javobgarlikka tortilmasligi haqida xabar beramiz”, — deydi Manchester politsiyasi.
