Ижтимоий тармоқларда Сирдарё вилоятида ўтказиладиган кўпкари учун Зомин қўриқхонасидан бўри олиб келиниши ҳақида видеохабарлар тарқалди. Ушбу хабарлар юзасидан Сирдарё ва Жиззах вилоятлари Экология ҳамда Ички ишлар бошқармалари ходимлари томонидан ўрганиш ишлари олиб борилди.
Ўрганиш натижасида видеотасвирдаги фуқаролардан бири Ховос туманининг “Истиқлол” МФЙда яшовчи фуқаро Ш.Р экани аниқланди. У кўпкарига соврин учун бўри қўйишни мақсад қилгани, видеотасвирдаги ҳолат Жиззах вилоятининг Зомин туманида тасвирга олингани ва бўри ушбу туманда яшовчи фуқаро Э.А нинг уйида сақланаётганини билдирган.
Ҳолат юзасидан белгиланган тартибда ҳужжатлар расмийлаштирилиб, Жиззах вилояти Экология ва Ички ишлар бошқармалари ходимларига тегишли маълумотлар тақдим қилинган.
Ушбу маълумотларга асосан Зомин тумани Экология бўлими ва ички ишлар ходимлари томонидан олиб борилган ўрганишлар давомида “Туркман” МФЙда яшовчи К.Ғ. исмли фуқаро ўз хонадонида бўрини ноқонуний тарзда тутқунликда сақлаб келаётгани аниқланган.
Ушбу фуқаро бу ҳаракати билан “Ҳайвонот дунёсини муҳофаза қилиш ва ундан фойдаланиш тўғрисида”ги қонуннинг 4, 32, 33-моддалари талабларини бузган. Шундан келиб чиқиб, мазкур фуқарога нисбатан Маъмурий жавобгарлик тўғрисидаги кодекснинг 90-моддаси, 1-бандига асосан БҲМнинг 10 баравари, яъни 3 миллион сўм миқдорида жарима белгиланди.
Давлат инспекторлари томонидан бўрининг ҳолати кўздан кечирилганда, жонивор соғлом экани аниқланган ва у табиат бағрига қўйиб юборилган.
Изоҳ (0)