Davlat statistika qo‘mitasi 2022-yil yanvar—dekabr oylari bo‘yicha ulgurji savdo aylanmasini e’lon qildi.

Mamlakat bo‘yicha ulgurji savdo aylanmasi 247 trln so‘m, ya’ni 2021-yilning yanvar—sentabr oylariga nisbatan 26,8 foizga o‘sgan.

Tarkibiy qismlari 73,7 foiz mikrofirma va kichik korxonalari va 26,3 foiz yirik korxonalar hissasiga to‘g‘ri keldi.

Kichik biznes subyektlarining ulgurji savdo aylanmasidagi ulushi 182 trln so‘mni tashkil qilgan. Bu esa 2021-yilning mos davriga nisbatan 29,8 foizga o‘sishni anglatadi.

Tovar aylanmasida eng yuqori ulush Toshkent shahrida — 59,5 foiz. Keyingi o‘rinlarda Toshkent (7,6 foiz) va Farg‘ona (5,8 foiz) viloyatlariga to‘g‘ri keladi.

Yuqori o‘sish sur’atlariga ega yirik korxonalar Buxoro (7,6 barobar), Navoiy (227,4 foiz) va Surxondaryo (180,1 foiz) viloyatlarida kuzatildi.

So‘nggi yillarda ulgurji savdoda davlat sektorining o‘rni pasayib bormoqda. Ushbu sektorning jami ulgurji tovar aylanmasidagi ulushi 0,1 foizni tashkil qildi.

Nodavlat tasarrufga ega subyektlar tomonidan ulgurji savdo aylanmasi 246,9 trln so‘mni va davlat tasarrufiga ega korxonalar tomonidan 159,3 mlrd so‘mni tashkil etdi.

Hududlar kesimida davlat mulkini hali ham Toshkent shahrida (0,1 foiz), Navoiy (0,14 foiz) va Andijon (0,04 foiz) viloyatlarida saqlanib qolinganligini ko‘rish mumkin.

Boshqa barcha hududlarda ulgurji savdo to‘liq nodavlat mulkka tegishli.