AQSHdagi eng yaxshi va eng yomon aviakompaniyalar e’lon qilindi

The Wall Street Journal (WSJ) AQSHning “eng yaxshi va eng yomon aviakompaniyalari” yillik reytingini taqdim etdi. 

Delta oxirgi olti yil ichida besh marta, ketma-ket ikkinchi marta 1-o‘rinni egalladi. Keyingi o‘rinlarda Alaska Airlines va Southwest Airlines qayd etilgan. 

Reytingda jami to‘qqizta yirik Amerika aviakompaniyasi bor, JetBlue va Frontier oxirgi o‘rinlarni egallagan.

WSJ bunday reytingni 15-marta nashr etmoqda. Nashr aviakompaniyalarni baholaydigan parametrlar qatoriga rejalashtirilgan reyslarning yetib kelishi, bekor qilingan reyslar, parvozning kechikishi, noto‘g‘ri joylangan bagaj va yo‘lovchilarning shikoyatlari kiradi.

WSJ ekspertlarining ta’kidlashicha, 2022-yil butun dunyodagi aviakompaniyalar, jumladan, Amerika aviakompaniyalari uchun og‘ir yil bo‘ldi. 

Ikki yillik pandemiyadan so‘ng parvozlarga talabning keskin ortishi asosiy qiyinchiliklardan biri bo‘ldi — cheklovlar davrida xodimlarini ishdan bo‘shatgan aviakompaniyalar bunga tayyor emas edi. 

Xodimlar yetishmasligi, texnik nosozliklar va yomon ob-havo tufayli o‘n minglab reyslar bekor qilindi va kechiktirildi. Birinchi o‘rinni egallagan Delta 2022-yilni o‘z tarixidagi eng qiyin yil deb atadi.

Avvalroq dunyoda aviachiptalar narxi oshayotganining sabablari ma’lum qilingandi.