Aleksey Arestovich Dneprga qulagan Rossiya raketasiga oid janjalli bayonotidan so‘ng Zelenskiy ofisining maslahatchisi lavozimidan ketdi
Aleksey Arestovich Ukraina prezidenti ofisiga shtatdan tashqari maslahatchi lavozimidan voz kechish to‘g‘risida ariza yozdi.
“Men madaniyatli xulq-atvorning namunasini ko‘rsatmoqchiman: fundamental xato qilindimi, demak iste’foga”, — deb yozdi u ijtimoiy tarmoqlarda arizasining suratini ilova qilib.
Arestovich Dneprdagi turar joy binosiga 14-yanvar kuni kelib urilgan Rossiya raketasi Ukraina havo hujumidan mudofaa kuchlari tomonidan urib tushirilgani haqida bayonot berganidan so‘ng Ukrainada keskin tanqid ostiga olindi. “Uni urib tushirishdi, u podyezdga quladi. Qulagandan keyin portladi ”, — degandi u YouTube dasturida.
Dnepr meri Boris Filatov Ukraina Qurolli kuchlaridan Arestovichning so‘zlariga javob berishni talab qildi, Oliy Rada deputati Aleksey Goncharenko uni ishdan bo‘shatish uchun imzo to‘planganini e’lon qildi.
17-yanvar kuni Arestovich o‘zi aytgan gaplar uchun uzr so‘radi. “Men jonli efirda jiddiy xatoga yo‘l qo‘ydim. Tomoshabinlar qanday sabab bilan buni eshitgani ahamiyatsiz, lekin bundan buyon o‘zim aytayotgan ma’lumotlarga jiddiyroq munosabatda bo‘laman. Men qurbonlar va ularning yaqinlaridan, Dnepr aholisidan hamda Rossiya raketasining turar joy binosiga urilishi bo‘yicha noto‘g‘ri talqinimdan qattiq xafa bo‘lgan barchadan chin dildan uzr so‘rayman”, — deb yozdi u ijtimoiy tarmoqlarda.
Ma’lumot uchun, Dneprdagi binoga raketa hujumi oqibatida halok bo‘lganlar soni 44 kishiga yetgan.
