«Челси» Мудрик трансфери борасида келишувга эришди. Лондон клуби бонуслар билан 110 млн евро тўлайди

«Челси» клуби «Шахтёр» билан ҳужумчи Михайло Мудрикнинг трансфери борасида келишиб олди.

The Athletic хабарига кўра, лондонликлар 22 ёшли футболчи трансфери учун 70 миллион евро тўлайди, шунингдек, 40 миллион евро бонус пуллари назарда тутилган. Клуб украиналик футболчи билан 7 йиллик шартнома имзолайди.

Футболчининг йиллик маоши 7,5 миллион еврони ташкил қилади, дея хабар қилмоқда Николо Скира.

Мудрик учун асосий даъвогар «Арсенал» бўлиб турганди. Аввалроқ «канонирлар» Михайло учун 90—95 миллион евро таклиф қилгани хабар қилинганди.

Бироқ «Челси» сўнгги лаҳзада футболчини ўз томонига оғдиришга эришган. Қайд этилишича, «Челси» маош борасида ҳамшаҳаридан икки баробар кўп пул таклиф қилган. Мудрик ўзи аввалига «Арсенал» вариантини маъқул кўрган, бироқ «Челси»нинг оператив ишлаши унинг ўз фикридан қайтишига сабаб бўлган.

Футболчи Украина Премер Лигаси жорий мавсумида 12 та ўйин ўтказиб, 7 та гол ва 7 та голли узатма муаллифига айланди. Шунингдек, у Чемпионлар Лигасидаги 6 ўйинда 3 та гол ва 2 та ассист амалга оширган.