O‘zbekistonning Aqtau shahridagi Bosh konsulligi qattiq sovuq havo tufayli Qozog‘iston avtomobil yo‘llarida qiyin ahvolga tushib qolgan vatandoshlar bilan bog‘liq vaziyatni nazorat ostiga olgan, deb xabar qilmoqda “Dunyo” axborot agentligi.
Jumladan, 10-yanvar kuni mahalliy vaqt bilan soat 20:00 atrofida Samara—Shimkent xalqaro trassasining 75-kilometrida 70 874 MBA davlat raqamli meva olib ketayotgan O‘zbekiston yuk avtomashinasining ishdan chiqqani haqida ma’lumot kelib tushgan. Bosh konsullik xodimlari tomonidan ushbu haydovchilarga zudlik bilan yordam ko‘rsatilgan va ular issiq joyga joylashtirilgan. Qurbonlar yo‘q.
Shuningdek, 10-yanvar kuni Irg‘iz tumani markazidan o‘tgan yo‘lning yopiq 20-kilometrida Rossiyaga ketayotgan 41 nafar O‘zbekiston fuqarosi bo‘lgan shaharlararo avtobus to‘xtab qolgan. Yo‘lovchilar Aqto‘be viloyati Irg‘iz qishlog‘idagi o‘rta maktabga joylashtirilgan.
Shu kuni mahalliy vaqt bilan soat 22:49 da Samara—Chimkent avtomobil yo‘lining 968-kilometrida Aqto‘be viloyatining Aytekebi tumanida avtobusdan odamlarni evakuatsiya qilish zarurligi haqida xabar kelgan. Qutqaruvchilar yordamida 31 nafar O‘zbekiston fuqarosi Qorabutoq qishloq masjidiga evakuatsiya qilingan. Hech kim jabrlanmagan.
11-yanvar kuni avtomobil yo‘llarida harakat ochilganidan so‘ng vatandoshlar Rossiyaga safarlarini davom ettirgan.
“Shu o‘rinda ob-havo sharoitining yomonlashuvi munosabati bilan O‘zbekiston Bosh konsulligi vatandoshlardan ob-havo barqarorlashgunga qadar Qozog‘iston hududi bo‘ylab avtotransport va avtobusda harakatlanmaslikni tavsiya qiladi”, — deyiladi xabarda.
Izoh (0)