Toshkent shahar IIBB tarkibida kuchli ta’sir qiluvchi modda bo‘lgan dorini ozdiruvchi vosita deb sotayotganlardan ogohlantirdi.
Ma’lum qilinishicha, so‘nggi vaqtlarda ijtimoiy tarmoqlarda ozdiruvchi mahsulot sifatida “Fatzorb” nomli dori vositasini sotishmoqda. Ushbu dori tarkibida sibutramin moddasi mavjud bo‘lib, kuchli ta’sir qiluvchi modda hisoblanadi. Kuchli ta’sir qiluvchi moddalarni qonunga xilof ravishda muomalaga kiritish O‘zbekiston qonunchiligiga muvofiq javobgarlikka tortishga asos bo‘ladi.
Shunday bir guruh kishilar ijtimoiy tarmoqlarda ozdiruvchi mahsulotlar savdosi bilan shug‘ullanishini ma’lum qilib, sahifa ochgani va kuchli ta’sir qiluvchi moddalarni onlayn savdosi bilan shug‘ullanayotgani aniqlangan.
5-yanvar kuni Sergeli tumani Obihayot ko‘chasida 1992-yilda tug‘ilgan D.S. va 1993-yilda tug‘ilgan K.S. 600 ming so‘m evaziga 180 dona “Fatzorb” nomli dori vositasini sotayotgan vaqtida Toshkent shahar IIBB xodimlari tomonidan ushlangan.
Shuningdek, K.S. boshqaruvidagi avtomashina xolislar ishtirokida tekshirilganda yana 72 dona “Fatzorb” nomli dori vositasi aniqlangan va ashyoviy dalil sifatida olingan.
Hozirda mazkur holat yuzasidan tergovga qadar tekshiruv o‘tkazilmoqda. Tekshiruv yakuni bo‘yicha qonuniy qaror qabul qilinishi ta’minlanadi.
“Hurmatli fuqarolar! Har qanday dori vositasini sotib olishdan va uni iste’mol qilishdan avval shifokorlar bilan maslahatlashing. Shifokorlarning tavsiyasi bo‘lmasa, hech qaysi dori vositalarini iste’mol qilmang. Unutmang, noto‘g‘ri qo‘llanilgan, iste’mol qilingan dori inson sog‘lig‘iga ziyon yetkazishi mumkin”, — deya ogohlikka chaqirgan poytaxt IIBB matbuot xizmati.
Izoh (0)