Oliy Majlis Senatining 27-dekabr kungi oʻttiz oltinchi yalpi majlisida “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi qonun koʻrib chiqildi. Bu haqda yuqori palata axborot xizmati xabar berdi.
Foto: “Daryo” / Maʼmurjon Obrahmatov
Qayd etilishicha, ushbu huquqiy hujjatni koʻrib chiqish jarayonida senatorlar yoʻllarda sodir boʻlayotgan yoʻl-transport hodisalari jamiyatni xavotirga solayotganini qayd etib, ularning kelib chiqish sabablarini aniqlash va ularning oldini olishda tegishli masʼul xodimlarning masʼuliyatini yanada oshirilishi lozimligini taʼkidladi.
Shu bilan birga, oʻrganishlarning koʻrsatishicha, avtomototransport vositalari haydovchilarini tayyorlash, qayta tayyorlash va ularning malakasini oshirish tizimida ham mavjud boʻlgan kamchiliklar avtomobil yoʻllarida turli qoidabuzarliklar va oʻlim bilan tugayotgan yoʻl-transport hodisalarining sodir etilishiga sabab boʻlmoqda.
Qonunga koʻra, avtomototransport vositalari va shahar elektr transporti vositalari haydovchilarini tayyorlash hamda qayta tayyorlash boʻyicha faoliyatni, shuningdek avtomototransport vositalari va shahar elektr transporti vositalari haydovchilarining malakasini oshirish yuzasidan xabardor qilish tartibida amalga oshiriladigan faoliyatni litsenziyalash boʻyicha vakolatli organ maqomi Vazirlar Mahkamasi huzuridagi Taʼlim sifatini nazorat qilish davlat inspeksiyasidan Ichki ishlar vazirligiga oʻtkazilmoqda.
Bundan tashqari, qonun bilan avtomototransport vositalari va shahar elektr transporti vositalari haydovchilarini tayyorlash hamda qayta tayyorlash sohasida faoliyatni litsenziyalash uchun toʻlanadigan davlat boji bazaviy hisoblash miqdorining 10 baravari miqdorida belgilanmoqda. Shuningdek, “Davlat boji toʻgʻrisida”gi hamda “Litsenziyalash, ruxsat berish va xabardor qilish tartib-taomillari toʻgʻrisida”gi qonunlarga tegishli oʻzgartish va qoʻshimchalar kiritilmoqda. Qonun senatorlar tomonidan maʼqullandi.
Izoh (0)