Prezident Shavkat Mirziyoyev 13-dekabr kuni Uchtepa tumaniga qilgan tashrifi chog‘ida ko‘p qavatli uylar va ularning atrofi qay darajada obodonlashtirilganini ko‘zdan kechirgan edi. O‘shanda davlat rahbari avvaldan rejalashtirilmagan holda xonadonlardan birining sohibi bilan ko‘rsatilayotgan kommunal xizmatlar sifati haqida suhbatlashgandi.
“Daryo” muxbiri prezident bilan uchrashgan xonadon egasi Aleksandr Sokolovdan qisqacha intervyu oldi. Undan kutilmagan tashrif vaqtidagi taassurotlari va yashash tarzi haqida so‘radi.
Aleksandr Sokolovning aytishicha, prezidentning tashrifi oldindan rejalashtirilmagan va u buni kutmagan.
“Shavkat Mirziyoyev istalgan xonadonga kirishi mumkin edi. Mendan issiqlik tizimi haqida so‘radi. Prezident menga “Hammasi yaxshi bo‘ladi”, deb aytdi. Shokka tushib qolgan edik. Hamma uchun kutilmagan holat bo‘ldi
Prezidentni yaqindan ko‘rdim, qo‘l berib ko‘rishdim”, — dedi xonadon egasi.
U uyi yaqinidagi maktablarining birida hovli supuruvchi bo‘lib ishlaydi.
“Uchrashuvdan keyin atrofdagilarni menga munosabati o‘zgardi. Uchta farzandim bor. Bolalarim katta: o‘qiydi, ishlaydi”, — dedi Aleksandr Sokolov.
Uy-joy kommunal xizmat ko‘rsatish vaziri o‘rinbosari Ozoda Jo‘rayeva “Daryo”ga ma’lum qilishicha, Aleksandr Sokolov 3 xonali uyda uch farzandi va ayoli bilan birga yashaydi.
“Uning uyi ta’mirlab berilyapti. Vaqtincha boshqa xonadonga ko‘chirib turibmiz. Xonadon to‘liq ta’mirdan chiqqanidan keyin maishiy texnik jihozlar ham beriladi”, — dedi Ozoda Jo‘rayeva.
Izoh (0)