IT Park 14 yoshda muvaffaqiyatli dasturchiga aylangan yigit haqida hikoya qildi

IT Park endigina 14 yoshni qarshilagan Yahyobek Tohirjonovning muvaffaqiyat hikoyasini taqdim etdi.

Andijon viloyatida tug‘ilib o‘sgan Yahyobek o‘rta maktabdagi asosiy ta’limdan tashqari “Web King” o‘quv markazida full stack dasturlash bo‘yicha o‘qiydi.

Yahyobekning aytishicha, uning dasturlashga qiziqishi bir necha yil oldin paydo bo‘lgan.

“Men 12 yoshimdan dasturlashga qiziqaman. Avvaliga bu nazariya edi, keyin esa o‘zimni ko‘proq sinab ko‘rmoqchi bo‘ldim – izlanish va ijod qilish, o‘zimcha nimadir qilishga intildim. O‘zimga yoqqan narsani topganimdan va hammasi men xohlagandek bo‘lib ketganidan xursandman,” — deydi yosh mutaxassis.

Nima uchun aynan IT va uni bu sohaga nima jalb qildi degan savolga yigit shunday javob beradi: “bu yerda innovatsiyalar joriy etilishi mumkin, kelajak esa, o‘zingiz bilganingizdek, ularga tegishli.”

Ota-onalar o‘g‘lining bu sohaga qiziqishini tushungan holda uni har narsada qo‘llab-quvvatlaydi. Yosh dasturchi yo‘lda hech qanday qiyinchiliklarga duch kelmadi. Kompyuterning yo‘qligi bundan mustasno.

“Ehtimol, IT sohasida ta’lim olganimdan beri duch kelgan yagona qiyinchilik, menda kompyuter yo‘qligi edi. Biroq, keyinroq ota-onam menga noutbuk sovg‘a qildi, men bu sovg‘adan juda xursand bo‘ldim”, — deb eslaydi Yahyobek.

Sovg‘a juda qo‘l keldi. Aynan shu noutbuk yordamida Yahyobek o‘zining birinchi “Parvoz Trade” loyihasini yaratdi, u allaqachon to‘laqonli platformaga aylangan.

“Men “Parvoz Trade” loyihasini ishlab chiqdim. Bu biznes egalari yuqori sifatli va arzon ishlab chiqarish tovarlari va korxona rivojlanishi uchun zarur bo‘lgan uskunalarni xarid qilishlari mumkin bo‘lgan onlayn platformadir. Bugun bizda o‘nlab minnatdor va mamnun mijozlar bor va biz platformani yanada rivojlantirmoqchimiz”, — deydi rukn mehmoni.

Yahyobekning kelajakdagi rejalari faqat IT sohasi bilan bog‘liq. U muvaffaqiyatli dasturchi bo‘lishni va mustaqil ishlashni orzu qiladi.

“Sohaga endigina qadam qo‘ygan dasturchilarga yaxshi ustozlarga uchrashini va o‘qishlarida sabr tilayman. O‘z-o‘zini rivojlantirish haqida unutmasligimiz kerak. IT sohasida siz doimo o‘z ustingizda ishlashingiz va yangi narsalarni o‘rganishingiz kerak, chunki texnologiya bir joyda turmaydi. Asosiysi, o‘z ishingizni seving va ishga butun qalbingizni bag‘ishlang, shunda natija o‘zini kuttirmaydi, — deydi Yahyobek.

14 yoshli Yahyobekning muvaffaqiyati barchaga o‘rnak bo‘la oladi. Yoshlik orzular ro‘yobi va yaxshi kasb egallashga to‘sqinlik qilmasligini isbotladi.

Mavzuga doir: IT Park oyiga 700 dollar topayotgan qoraqalpog‘istonlik robototexnika mentori haqida hikoya qildi