IT Park 14 ёшда муваффақиятли дастурчига айланган йигит ҳақида ҳикоя қилди

IT Park эндигина 14 ёшни қаршилаган Яҳёбек Тоҳиржоновнинг муваффақият ҳикоясини тақдим этди.

Андижон вилоятида туғилиб ўсган Яҳёбек ўрта мактабдаги асосий таълимдан ташқари Web King ўқув марказида full stack дастурлаш бўйича ўқийди.

Яҳёбекнинг айтишича, унинг дастурлашга қизиқиши бир неча йил олдин пайдо бўлган.

«Мен 12 ёшимдан дастурлашга қизиқаман. Аввалига бу назария эди, кейин эса ўзимни кўпроқ синаб кўрмоқчи бўлдим – изланиш ва ижод қилиш, ўзимча нимадир қилишга интилдим. Ўзимга ёққан нарсани топганимдан ва ҳаммаси мен хоҳлагандек бўлиб кетганидан хурсандман,» — дейди ёш мутахассис.

Нима учун айнан IT ва уни бу соҳага нима жалб қилди деган саволга йигит шундай жавоб беради: «бу ерда инновациялар жорий этилиши мумкин, келажак эса, ўзингиз билганингиздек, уларга тегишли.»

Ота-оналар ўғлининг бу соҳага қизиқишини тушунган ҳолда уни ҳар нарсада қўллаб-қувватлайди. Ёш дастурчи йўлда ҳеч қандай қийинчиликларга дуч келмади. Компьютернинг йўқлиги бундан мустасно.

«Эҳтимол, IT соҳасида таълим олганимдан бери дуч келган ягона қийинчилик, менда компьютер йўқлиги эди. Бироқ, кейинроқ ота-онам менга ноутбук совға қилди, мен бу совғадан жуда хурсанд бўлдим», — деб эслайди Яҳёбек.

Совға жуда қўл келди. Айнан шу ноутбук ёрдамида Яҳёбек ўзининг биринчи Parvoz Trade лойиҳасини яратди, у аллақачон тўлақонли платформага айланган.

«Мен Parvoz Trade лойиҳасини ишлаб чиқдим. Бу бизнес эгалари юқори сифатли ва арзон ишлаб чиқариш товарлари ва корхона ривожланиши учун зарур бўлган ускуналарни харид қилишлари мумкин бўлган онлайн платформадир. Бугун бизда ўнлаб миннатдор ва мамнун мижозлар бор ва биз платформани янада ривожлантирмоқчимиз», — дейди рукн меҳмони.

Яҳёбекнинг келажакдаги режалари фақат IT соҳаси билан боғлиқ. У муваффақиятли дастурчи бўлишни ва мустақил ишлашни орзу қилади.

«Соҳага эндигина қадам қўйган дастурчиларга яхши устозларга учрашини ва ўқишларида сабр тилайман. Ўз-ўзини ривожлантириш ҳақида унутмаслигимиз керак. IT соҳасида сиз доимо ўз устингизда ишлашингиз ва янги нарсаларни ўрганишингиз керак, чунки технология бир жойда турмайди. Асосийси, ўз ишингизни севинг ва ишга бутун қалбингизни бағишланг, шунда натижа ўзини куттирмайди», — дейди Яҳёбек.

14 ёшли Яҳёбекнинг муваффақияти барчага ўрнак бўла олади. Ёшлик орзулар рўёби ва яхши касб эгаллашга тўсқинлик қилмаслигини исботлади.

Мавзуга доир: IT Park ойига 700 доллар топаётган қорақалпоғистонлик робототехника ментори ҳақида ҳикоя қилди