Oila va xotin-qizlar qo‘mitasi hamda uning boshqarmalariga bog‘lanish tekshirildi — natijalar yomon

“Daryo” internet-nashri davlat idoralariga fuqarolar qo‘ng‘iroq qilib, o‘zlarini qiziqtirgan savollarga qay darajada javob olishlari yuzasidan o‘rganishlar olib bormoqda.

Bu galgi obyektimiz — O‘zbekiston oila va xotin-qizlar davlat qo‘mitasi va uning hududiy boshqarmalari bo‘ldi. Qo‘mitaning rasmiy saytida faqat viloyatlardagi boshqarmalarning telefon raqami ko‘rsatilgani bois tuman va shaharlardagi bo‘limlar bilan bog‘lanishning imkoni bo‘lmadi.

Qiziq jihati, qo‘mita raisidan tortib uning o‘rinbosarlariga aloqaga chiqish uchun bitta raqam ko‘rsatilgan bo‘lib, mazkur raqam orqali bog‘lanish uchun qilingan harakatlarimiz zoye ketdi.

Qo‘mitaning hududlardagi boshqarma boshliqlari qabulxonalariga bog‘lanish uchun bir necha marotaba qilingan qo‘ng‘iroqlarga:

• Toshkent shahar,
• Toshkent viloyati,
• Namangan viloyati
• Andijon viloyati
• Sirdaryo viloyati
• Samarqand viloyati
• Navoiy viloyati
• Xorazm viloyati boshqarmasidan hech kim javob bermadi. Qo‘mitaning qolgan boshqarmalaridagi mas’ul shaxslar go‘shakni ko‘tarib, barcha savollarimizga to‘liq javob berdi.

Albatta, o‘rganishlarimiz nisbiy. Boisi “Daryo” muxbiri bog‘lanish uchun qo‘ng‘iroq qilgan vaqtda mas’ul xodim ish bilan band bo‘lishi yoki boshqa sabablarga ko‘ra go‘shakni ko‘tarolmagan bo‘lishi mumkin. Ammo butun respublikadagi boshqarmalarning yarmidan ko‘pi bilan bunday muammo kuzatilishi tizimda ushbu masalani jiddiy o‘rganish zaruratini ko‘rsatmoqda.

“Daryo” voqealar rivojini kuzatib boradi.