“Tolibon” Qatarda JCH-2022 uchun stadionlar qurilishiga yordam berganini rad etdi

“Tolibon” harakati The Telegraph nashrida Qatardagi jahon chempionati stadionlari qurilishida qatnashib, millionlab foyda ko‘rgani haqida e’lon qilingan ma’lumotni rad etdi. Bu haqda Aamaj news xabar berdi.

“Tolibon” bayonotiga ko‘ra, bunday tashviqot G‘arb ommaviy axborot vositalari razvedka missiyasining bir qismi hisoblanadi. “Tolibon” matbuot kotibi Zabihulloh Mujohid Twitter’dagi sahifasida bu xabar haqiqatga to‘g‘ri kelmasligi va Qatarda bunday kelishuv bo‘lmaganini yozdi.

U Dohada 6 dan 10 tagacha og‘ir texnikaga ega bo‘lganlari va stadion qurilishiga texnika yetkazib berish orqali oyiga 10 000 funt sterling foyda olganlariga javoban quyidagilarni ma’lum qildi:

“‘Tolibon’ning hech birida og‘ir texnika bo‘lmagan. Stadion qurilishiga sarmoya kiritmagan va Qatarning hech bir kompaniyasi bilan bunday texnikalar haqida shartnoma tuzmagan”.

Telegraph nashriga ko‘ra, Qatar hukumati “G‘arb bilan tinchlik muzokaralariga hissa qo‘shish bo‘yicha sa’y-harakatlar doirasida” AQSH va BMTning roziligi bilan “Tolibon”ning Dohadagi a’zolariga bir necha ming dollar miqdorida oylik pul ta’minoti berib turgan.

Dastlab bu pullar naqd bo‘lgan, ammo keyinchalik u to‘g‘ridan to‘g‘ri “Tolibon” rasmiylarining bank hisob raqamiga tushgan. Bu esa Amerika va Qatar rasmiylariga xarajatlarni kuzatishni qiyinlashtirgan. Shuningdek, “Tolibon” sportkarlar, bepul tibbiy xizmat va muntazam oziq-ovqat bilan ta’minlangani ilgari surilgan.

Telegraph “Tolibon” rasmiylari og‘ir uskunalarni Qatardagi qurilish kompaniyalariga sotish va ijaraga berish orqali millionlab dollar ishlab topganini qayd etgandi.