Qatarda JCH-2022 uchun stadionlar qurilishiga “Tolibon” yordam bergan — Telegraph

“Tolibon” tashkiloti so‘nggi o‘n yil mobaynida Qatarga futbol bo‘yicha 2022-yilgi jahon chempionati uchun stadionlar qurishga texnika yetkazib bergan. Bu haqda The Telegraph harakat vakillariga tayanib xabar berdi.

JCH-2022 Qatarda bo‘lib o‘tishi haqida FIFA 2010-yilda e’lon qilgan. Gazeta eslatishicha, “Tolibon”ning bir qator rahbarlari 2013-yildan buyon Dohada yashab, u yerda AQSH va BMT bilan uzundan-uzoq tinchlik muzokaralarini olib borgan.

Nashr manbasiga ko‘ra (u ham 2021-yil yozida toliblar Afg‘onistonda hokimiyatni egallab olguniga qadar bo‘lgan o‘n yil davomida Qatar poytaxtida yashagan), “Tolibon” JCH arafasida “qurilishga katta mablag‘lar kiritgan”, qurilish firmalari esa texnika sotib olish va ijaraga olish uchun harakatga “millionlab” pul to‘lagan.

Telegraph’ning ikkita manbasi da’vo qilishicha, Qatar hukumati “G‘arb bilan tinchlik muzokaralariga hissa qo‘shish bo‘yicha sa’y-harakatlar doirasida” AQSH va BMTning roziligi bilan “Tolibon”ning siyosiy ofisi a’zolariga bir necha ming dollar miqdorida oylik pul ta’minoti berib turgan. Shuningdek, ularga yo‘ltanlamaslar, bepul tibbiy xizmat va muntazam oziq-ovqat yetkazmalari taqdim etilgan.

Dastlab toliblarga naqd ko‘rinishida pul to‘langan, keyin esa bank hisoblariga o‘tkazilgan, shu sababli AQSH va Qatar hukumati mablag‘larning keyingi harakatlarini kuzatishga qiynalgan. Nashr suhbatdoshlarining aytishicha, toliblar bu mablag‘larga qurilish texnikasini sotib olgan. Keyin esa ularni JCH uchun infratuzilma qurish bilan shug‘ullanayotgan kompaniyalarga qayta sotgan.

Gazeta yozishicha, Doha toliblarga to‘lovlar AQSH bilan kelishilgan holda nazorat qilinishini talab etmoqda. Qatar hukumati qandaydir qonun buzilishlariga aloqador bo‘lishi mmukinligi haqida hech qanday ma’lumotlar yo‘q. “Tolibon” vakili nashr bilan suhbat chog‘ida harakat a’zolari Qatarga JCH-2022 uchun qurilmalarni taqdim etganini rad etdi.

Futbol bo‘yicha jahon chempionati 20-noyabr kuni boshlandi. U 18-dekabrga qadar davom etadi. Qatar turnirga mezbonlik qilish huquqini qo‘lga kiritgan birinchi arab mamlakatiga aylandi.