Armaniston poytaxti Yerevanda Kollektiv xavfsizlik shartnomasi tashkiloti (KXSHT) sammiti oldidan norozilik namoyishlari bo‘lib o‘tdi, deb yozmoqda Sota Telegram kanali.
Qayd etilishicha, namoyishchilar qo‘llarida Putin va Lukashenkoning portretlari, shuningdek, Ukraina va AQSH bayroqlarini ko‘tarib olgan. Internetda tarqalgan videolarning birida ular ichida Rossiya tashqi ishlar vaziri Sergey Lavrov borligi taxmin qilinayotgan mashinani “Rossiya, ket!” degan hayqiriqlar bilan qarshi olgan.
Odamlarning qo‘lidagi plakatlarda “Putin, Lukashenko — persona non grata”, “Rossiya Armanistondan ket!”, “Rossiya — dushman!” degan shiorlar yozilgan. Shuningdek, voqea joyidan olingan videoda sariq-ko‘k bayroqlarni ko‘rish va Ukrainaga oid shiorlarni eshitish mumkin.
KXSHT matbuot xizmati bayonotida aytilishicha, Yerevandagi sammitda muhim masalalar qatorida inqirozga qarshi kurashish tizimini takomillashtirish va Armanistonga yordam ko‘rsatish bo‘yicha qo‘shma chora-tadbirlar ko‘rib chiqiladi. Tegishli deklaratsiya qabul qilinishi va bir qator hujjatlar, jumladan tinchlikparvar kuchlarni zamonaviy qurol-yarog‘ va harbiy texnika bilan ta’minlashni nazarda tutuvchi hujjatlar imzolanishi kutilmoqda.
23-noyabr, chorshanba kuni Yerevanda KXSHT sammiti bo‘lib o‘tadi, unga Armaniston bosh vaziri Nikol Pashinyan raislik qiladi. Unda Qozog‘iston prezidenti Qosim-Jo‘mart To‘qayev, Rossiya prezidenti Vladimir Putin va Belarus prezidenti Aleksandr Lukashenko ishtirok etishi rejalashtirilgan.
Izoh (0)