Арманистонда КХШТ саммити олдидан ташкилотга ва Путиннинг ташрифига қарши намойишлар бўлиб ўтди (фото ва видео)

Арманистон пойтахти Ереванда Коллектив хавфсизлик шартномаси ташкилоти (КХШТ) саммити олдидан норозилик намойишлари бўлиб ўтди, деб ёзмоқда Сота Telegram канали.

Қайд этилишича, намойишчилар қўлларида Путин ва Лукашенконинг портретлари, шунингдек, Украина ва АҚШ байроқларини кўтариб олган. Интернетда тарқалган видеоларнинг бирида улар ичида Россия ташқи ишлар вазири Сергей Лавров борлиги тахмин қилинаётган машинани «Россия, кет!» деган ҳайқириқлар билан қарши олган.

Одамларнинг қўлидаги плакатларда «Путин, Лукашенко — persona non grata», «Россия Арманистондан кет!», «Россия — душман!» деган шиорлар ёзилган. Шунингдек, воқеа жойидан олинган видеода сариқ-кўк байроқларни кўриш ва Украинага оид шиорларни эшитиш мумкин.

КХШТ матбуот хизмати баёнотида айтилишича, Еревандаги саммитда муҳим масалалар қаторида инқирозга қарши курашиш тизимини такомиллаштириш ва Арманистонга ёрдам кўрсатиш бўйича қўшма чора-тадбирлар кўриб чиқилади. Тегишли декларация қабул қилиниши ва бир қатор ҳужжатлар, жумладан тинчликпарвар кучларни замонавий қурол-яроғ ва ҳарбий техника билан таъминлашни назарда тутувчи ҳужжатлар имзоланиши кутилмоқда.

23 ноябрь, чоршанба куни Ереванда КХШТ саммити бўлиб ўтади, унга Арманистон бош вазири Никол Пашинян раислик қилади. Унда Қозоғистон президенти Қосим-Жўмарт Тўқаев, Россия президенти Владимир Путин ва Беларусь президенти Александр Лукашенко иштирок этиши режалаштирилган.