Ukraina energiya tizimiga Rossiyaning raketa zarbalari bilan yetkazilgan zarar 70 milliard grivnadan oshadi (qariyb 1,9 milliard dollar). Bunday raqamlarni Ukraina bosh vaziri Denis Shmigal hukumat majlisida keltirib o‘tdi.
Uning so‘zlariga ko‘ra, “Ukrenergo” tarmoqlarini qayta tiklash ustida hozir 70 ta ta’mirlash brigadalari yoki mingdan ortiq mutaxassislar ishlamoqda. Bu ishlar doirasida butun mamlakat bo‘ylab elektrning vaqtinchalik o‘chirib qo‘yilishi davom etmoqda. Shu bilan birga, Shmigal qayd etishicha, sovuq havolar boshlangani va fuqarolar tomonidan elektr energiyasi iste’moli oshgani sababli, avariyaviy o‘chishlar ham istisno qilinmayapti.
Shuningdek, bosh vazir elektr energiyasi Ukrainaning ba’zi shaharlarida boshqalariga nisbatan ko‘proq o‘chishi sababini tushuntirdi.
“Qisqa va lo‘nda qilib aytadigan bo‘lsam, elektr energiyasini ishlab chiqaradigan stansiya bilan yakuniy iste’molchi sifatida bizning uylarimiz o‘rtasida elektr energiyasini transport qiluvchi quyi stansiyalar va tarmoqlar bor. Rossiyalik terrorchilar aynan shu obyektlarga hujum qilmoqda. Shuning uchun ayrim viloyatlar yoki tumanlarga katta miqdorda elektr energiyasini uzatish imkoni yo‘q. Shu sababli cheklovlar mamlakat bo‘ylab notekis amalga oshmoqda”, — deya aniqlik kiritdi u.
Avvalroq Shmigal Rossiya zarbalari oqibatida Ukraina energiya tizimining qariyb 50 foizi izdan chiqqanini aytgandi.
Rossiya Mudofaa vazirligi 10-oktabrdan buyon Ukrainaning harbiy va energetika obyektlariga muntazam raketa zarbalari berib kelmoqda va buni 8-oktabr kuni Kerch bo‘g‘ozidagi Qrim ko‘prigi portlatilishiga javob deb atamoqda.
Ukraina hukumati ma’lumotlariga ko‘ra, 15-noyabr kuni Rossiya mamlakat energetika tizimiga urush boshidan buyon eng kuchli zarbani bergan. O‘qqa tutishlar fonida Ukrainada elektr energiyasi vaqti-vaqti bilan o‘chirib qo‘yilmoqda.
Rossiya prezidenti matbuot kotibi Dmitriy Peskov Ukrainaning ko‘plab hududlarida chiroq va issiqlik yo‘qligini muzokaralardan bosh tortayotgan Kiyev hukumati xatti-harakatlari oqibati deb atadi.
Izoh (0)