Rossiyaning raketa hujumlari oqibatida Ukraina energiya tizimining qariyb yarmi izdan chiqdi. Bu haqda mamlakat bosh vaziri Denis Shmigal brifing chog‘ida ma’lum qildi.
“Afsuski, Rossiya Ukrainaning muhim fuqarolik infratuzilmasiga raketa bilan zarbalar berib, tinch aholiga qarshi jang qilishda davom etmoqda va ularni qish paytida chiroq, suv ta’minoti, issiqlik va aloqadan mahrum qilmoqda. 15-noyabr kunining o‘zida Rossiya Ukraina shaharlariga qariyb 100 ta raketa uchirdi. Energiya tizimimizning deyarli yarmi izdan chiqarildi”, — dedi u.
Rossiya Mudofaa vazirligi 10-oktabrdan buyon Ukrainaning harbiy va energetika obyektlariga muntazam raketa zarbalari berib kelmoqda va buni 8-oktabr kuni Kerch bo‘g‘ozidagi Qrim ko‘prigi portlatilishiga javob deb atamoqda.
Ukraina hukumati ma’lumotlariga ko‘ra, 15-noyabr kuni Rossiya mamlakat energetika tizimiga urush boshidan buyon eng kuchli zarbani bergan. O‘qqa tutishlar fonida Ukrainada elektr energiyasi vaqti-vaqti bilan o‘chirib qo‘yilmoqda.
Rossiya prezidenti matbuot kotibi Dmitriy Peskov Ukrainaning ko‘plab hududlarida chiroq va issiqlik yo‘qligini muzokaralardan bosh tortayotgan Kiyev hukumati xatti-harakatlari oqibati deb atadi.
Izoh (0)