Россиянинг ракета ҳужумлари оқибатида Украина энергия тизимининг қарийб ярми издан чиқди. Бу ҳақда мамлакат бош вазири Денис Шмигаль брифинг чоғида маълум қилди.
«Афсуски, Россия Украинанинг муҳим фуқаролик инфратузилмасига ракета билан зарбалар бериб, тинч аҳолига қарши жанг қилишда давом этмоқда ва уларни қиш пайтида чироқ, сув таъминоти, иссиқлик ва алоқадан маҳрум қилмоқда. 15 ноябрь кунининг ўзида Россия Украина шаҳарларига қарийб 100 та ракета учирди. Энергия тизимимизнинг деярли ярми издан чиқарилди», — деди у.
Россия Мудофаа вазирлиги 10 октябрдан буён Украинанинг ҳарбий ва энергетика объектларига мунтазам ракета зарбалари бериб келмоқда ва буни 8 октябрь куни Керчь бўғозидаги Қрим кўприги портлатилишига жавоб деб атамоқда.
Украина ҳукумати маълумотларига кўра, 15 ноябрь куни Россия мамлакат энергетика тизимига уруш бошидан буён энг кучли зарбани берган. Ўққа тутишлар фонида Украинада электр энергияси вақти-вақти билан ўчириб қўйилмоқда.
Россия президенти матбуот котиби Дмитрий Песков Украинанинг кўплаб ҳудудларида чироқ ва иссиқлик йўқлигини музокаралардан бош тортаётган Киев ҳукумати хатти-ҳаракатлари оқибати деб атади.
Изоҳ (0)