O‘zbekiston elchixonasi xodimlari Yaponiyaning Kyosan Electric Manufacturring kompaniyasi bosh direktori o‘rinbosari Takayuki Tadjima bilan uchrashuv o‘tkazdi, deb xabar bermoqda “Dunyo” axborot agentligi.
Kyosan Electric Manufacturring kompaniyasi 1917-yilda tashkil etilgan. Yo‘llarda harakatni boshqarish uskunalari, shu jumladan, svetoforlar, ularni boshqarish tizimlarini ishlab chiqarish va o‘rnatish, yo‘llar va yo‘l kesishmalarida transport oqimlarini boshqarish bilan shug‘ullanadi. Bundan tashqari, kompaniya temir yo‘l infratuzilmasini boshqarish uchun uskunalar, jumladan, temir yo‘l liniyalarini almashtirish, temir yo‘l liniyalarida poyezdlar o‘rtasidagi to‘qnashuvlarni oldini olish tizimlari, elektr energiyasini barqarorlashtirish va uzluksiz ta’minlash, transport vositalarini boshqarish tizimlarini ishlab chiqaradi.
Uchrashuvda transport sohasida hamkorlik qilish, yo‘llar va chorrahalarda, ayniqsa, tig‘iz vaqtlarda tirbandlikning oldini olish maqsadida respublika shaharlarida transport oqimlarini boshqarish masalalari atroflicha muhokama qilingan.
O‘zbekiston shaharlarida transport vositalari oqimi yildan-yilga ortib, transport vositalari haydovchilari uchun yo‘llarda qiyinchiliklar tug‘dirayotgani qayd etildi. Toshkent uchun xavfsiz shahar konsepsiyasini yaratish bo‘yicha rejalar ham tasdiqlangan.
O‘z navbatida, yapon kompaniyasi vakillari Yaponiyadagi yo‘llar va chorrahalardagi transport oqimlarini boshqarish bo‘yicha o‘z tajribalarini o‘rtoqlashgan. Ta’kidlanishicha, kompaniya tizimi va uskunalari chorrahalar hamda yo‘llarni inson aralashuvisiz tartibga solish va tushirish imkonini beradi. Bu Yaponiya shaharlarida samarali qo‘llanilmoqda va avtotransport oqimlarini pasaytirish imkonini beryapti.
Bundan tashqari, kompaniya vakillari temir yo‘l transportida mavjud uskunalar va boshqaruv tizimlari, xususan, poyezdlarni avtomatik boshqarish moslamasi (ATS), ogohlantirish tizimi, yo‘lovchilar oqimini boshqarish, poyezdlar harakatini belgilangan jadvalga muvofiq sozlash bo‘yicha tajribalari haqidagi ma’lumotlarni ham o‘rtoqlashgan. Kompaniyada piyodalar va avtotransport vositalarini temir yo‘l kesishmalaridan o‘tuvchi poyezdlar to‘qnashuvidan himoya qiluvchi uskunalar ham mavjudligi ma’lum qilingan.
Muzokaralar chog‘ida O‘zbekistonda avtomobil va temir yo‘llarni boshqarish tizimlari hamda uskunalarini ishlab chiqarish, shuningdek, joriy etish masalalari muhokama qilingan. Yaponiya tomoni O‘zbekistonda elektr jihozlari ishlab chiqaruvchilar bilan hamkorlikda zarur jihozlar ishlab chiqarishni yo‘lga qo‘yishga tayyor ekanini ma’lum qilgan.
Bundan tashqari, kompaniya vakillari O‘zbekiston shaharlari yo‘llarida, keyinchalik chorrahalarda avtotransport oqimini tushirish tizimlarini joriy etish orqali tadqiqot ishlarini olib borish istagini ham bildirgan.
Izoh (0)