Navoiyda niqoblangan ikki shaxs viloyat hokimligi oldida quroldan o‘q uzdi (video)

Ijtimoiy tarmoqlarda ikki nafar shaxs yuzlariga niqob taqqan holda Navoiy viloyati hokimiyati yonida qurol bilan ko‘rinish bergani, havoga o‘q uzgani aks etgan videolavha tarqaldi. Ichki ishlar vazirligi holatga aniqlik kiritdi.

Qayd etilishicha, mazkur videorolik joriy yilning avgust oyida tasvirga olingan bo‘lib, 7-noyabr kuni tarmoqqa yuklangan.

Navoiy shahar IIB xodimlari qidiruvlari natijasida huquqbuzarlar ushlangan. Ulardan biri maktab o‘quvchisi bo‘lgan.

“Maqsad yomon emas edi, shunchaki qiziqib, internetda ko‘rgan videolarimizga taqlid qilib chiqqandik.

Niqobni o‘zimiz tikdik. Yomon oqibatlarga olib kelishini o‘ylamagandik”, — deydi videodagilardan biri.

“Niqob taqsam, birov meni topolmaydi deb o‘ylagandim. Lekin bir kunga ham bormadi. Afsusdaman”, — deydi boshqasi.

Ma’lum bo‘lishicha, ashyoviy dalil sifatida olingan qurol o‘yinchoq bo‘lgan.

Hozirda tergovoldi surishtiruv harakatlari olib borilmoqda.