Навоийда ниқобланган икки шахс вилоят ҳокимлиги олдида қуролдан ўқ узди (видео)

Ижтимоий тармоқларда икки нафар шахс юзларига ниқоб таққан ҳолда Навоий вилояти ҳокимияти ёнида қурол билан кўриниш бергани, ҳавога ўқ узгани акс этган видеолавҳа тарқалди. Ички ишлар вазирлиги ҳолатга аниқлик киритди.

Қайд этилишича, мазкур видеоролик жорий йилнинг август ойида тасвирга олинган бўлиб, 7 ноябрь куни тармоққа юкланган.

Навоий шаҳар ИИБ ходимлари қидирувлари натижасида ҳуқуқбузарлар ушланган. Улардан бири мактаб ўқувчиси бўлган.

«Мақсад ёмон эмас эди, шунчаки қизиқиб, интернетда кўрган видеоларимизга тақлид қилиб чиққандик.

Ниқобни ўзимиз тикдик. Ёмон оқибатларга олиб келишини ўйламагандик», — дейди видеодагилардан бири.

«Ниқоб тақсам, биров мени тополмайди деб ўйлагандим. Лекин бир кунга ҳам бормади. Афсусдаман», — дейди бошқаси.

Маълум бўлишича, ашёвий далил сифатида олинган қурол ўйинчоқ бўлган.

Ҳозирда терговолди суриштирув ҳаракатлари олиб борилмоқда.