Mehnat shartnomasiga qanday shartlar kiritilsa, o‘z-o‘zidan haqiqiy hisoblanmasligi ma’lum qilindi

O‘zbekistonda Mehnat kodeksi yangi tahrirda qabul qilingani haqida xabar berilgan edi. Adliya vazirligining “Huquqiy axborot” kanali yangi kodeksga ko‘ra mehnat shartnomasiga qanday shartlarning kiritilishi o‘z-o‘zidan haqiqiy hisoblanmasligi yuzasidan qo‘llanma-ma’lumot e’lon qildi.

Xususan,

• xodimning holatini mehnat qonunchiligiga va mehnat haqidagi boshqa hujjatlarga nisbatan yomonlashtiradigan;
• mehnat va mashg‘ulotlar sohasida kamsitishni taqiqlash talablarini buzadigan;
• majburiy mehnatni taqiqlash haqidagi talablarni buzadigan;
• xodimni qonunga xilof harakatlarni, boshqalarning yoki xodim o‘zining huquqlarini buzadigan, hayoti va sog‘lig‘iga tahdid soladigan, sha’niga, qadr-qimmatiga yoki ishchanlik obro‘siga putur yetkazadigan harakatlarni amalga oshirishga majburlaydigan shartlar.

Mehnat shartnomasi ayrim shartlarining haqiqiy emasligi mehnat shartnomasining umuman haqiqiy emasligiga sabab bo‘lmaydi. Kodeks rasmiy e’lon qilingan kundan e’tiboran 6 oy o‘tgach (2023-yil 30-apreldan) kuchga kiradi.

Mavzuga doir: Prezident yangidan ishlab chiqilgan Mehnat kodeksi loyihasiga to‘xtalib o‘tdi