Madridning “Real” klubi Chempionlar Ligasining 6-turida “Seltik”ni 5:1 hisobida mag‘lub etdi.
Bu “qaymoqranglilar” ustozi Karlo Anchelotti uchun musobaqadagi 102-g‘alaba bo‘ldi. Bu borada italiyalik mutaxassis “Manchester Yunayted” sobiq ustozi Aleks Fergyusonning rekordini takrorladi.
Ushbu statistikaga “Milan”ning 2004/05-yilgi mavsumda “Inter”ga qarshi o‘yindagi texnik g‘alabasi qo‘shilmagan. O‘sha o‘yin “rossoneri” darvozaboni Dida tomon uloqtirilgan fayer tufayli to‘xtatilgan va “Inter”ga texnik mag‘lubiyat yozilgandi.
Agar ushbu natija inobatga olinadigan bo‘lsa, u holda Anchelotti rekordchiga aylandi.
Anchelotti “Real” boshqaruvida YCHLdagi 32-g‘alabasiga erishdi (44 o‘yinda) va bu borada Zinedin Zidanni (53 o‘yinda 31 g‘alaba) ortda qoldirdi. Faqat Migel Munyos (71 o‘yinda 41 g‘alaba) va Visente del Boske (60 o‘yinda 34 g‘alaba) bu borada Karlodan oldinda.
Izoh (0)