Birlashgan Millatlar Tashkilotining madaniyat bo‘yicha agentligi YUNESKO Rossiyaning Ukrainaga bostirib kirishi oqibatida Ukrainadagi 207 ta madaniy obida zarar ko‘rganini ma’lum qildi. Bu haqda Al Jazeera telekanali xabar bermoqda.
Xususan, ular — 88 ta diniy obida, 15 ta muzey, 76 ta tarixiy va/yoki badiiy ahamiyatga ega binolar, 18 ta yodgorlik va 10 ta kutubxona.
“Biz vaziyat yomon degan xulosaga keldik. Bundan ham yomonlashishi mumkin”, — dedi YUNESKOning Madaniyat va favqulodda vaziyatlar bo‘yicha direktori Krista Pikkat Jenevada bo‘lib o‘tgan matbuot anjumanida.
Shu bilan birga, uning qo‘shimcha qilishicha, hozircha Ukraina hududida joylashgan yettita jahon merosining birortasiga zarar yetmagan.
YUNESKO o‘z xulosalarini YUNOSAT BMT sun’iy yo‘ldosh markazi ma’lumotlariga asoslanib chiqaradi.
“Mahalliy joylardan olingan hisobotlarga asoslanib, YUNESKO YUNOSATga potensial shikastlangan obyektlar ro‘yxatini yuboradi. So‘ngra agentlik sun’iy yo‘ldosh tasvirlarini oladi kichik mutaxassislar guruhi esa oldingi va keyingi fotosuratlar o‘rtasidagi farqni tekshiradi”, — deb tushuntirdi Krista Pikkat.
Uning qo‘shimcha qilishicha, YUNESKO urush davrida mamlakatdan madaniy meros obyektlarini eksport qilish imkoniyatini Kiyev bilan muhokama qilgan.
Avvalroq Ukraina madaniyat va axborot siyosati vaziri Aleksandr Tkachenko Ukrainadagi muzey rekvizitlari va eksponatlarini saqlashda yordam so‘rab YUNESKOga murojaat qilishga majbur bo‘lganini ma’lum qilgandi.
Izoh (0)