«Дарё» нашри 19 октябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Путин аннексия қилинган ҳудудларда ҳарбий ҳолат жорий этиш тўғрисида фармон имзолади
Россия давлат раҳбари Владимир Путин «Донецк Халқ Республикаси, Луганск Халқ Республикаси, Запорожье ва Херсон вилоятлари ҳудудларида ҳарбий ҳолат жорий этиш тўғрисида»ги Фармонни имзолади.
Россиядаги «ҳарбий ҳолат» ярим тундан бошлаб кучга киради ва қуйидагиларни ўз ичига олади:
— Фуқароларнинг мамлакат ташқарисига чиқишини тақиқлаш;
— Иқтисодий, ижтимоий ва маданий объектларни эвакуация қилиш, шунингдек, аҳолини хавфсиз ҳудудларга вақтинча кўчириш;
— Ҳудудга кириш ва чиқишнинг алоҳида режимини жорий этиш, шунингдек, у ерда ҳаракатланиш эркинлигини чеклаш;
— Мудофаа эҳтиёжлари учун вазифаларни бажаришга фуқароларни жалб қилиш, душман томонидан қурол ишлатиш оқибатларини бартараф этиш, хўжалик объектларини тиклаш.
— Ташкилотлар ва фуқаролардан мудофаа эҳтиёжлари учун зарур бўлган мол-мулкни кейинчалик унинг қийматининг давлат томонидан тўлаб берилишини инобатга олган ҳолда олиб қўйиш;
— Алоқа соҳасида ҳарбий цензура, шунингдек, телефон суҳбатлари устидан назоратни жорий этиш.
Энергодар HIMARS билан ўққа тутилди. Украина қўшинлари Запорожье АЭСни эгаллаб олишга урингани айтилмоқда
Россия томонидан аннексия қилинган Запорожье вилоятининг Энергодар шаҳри 19 октябрга ўтар кечаси HIMARS ёппасига ўт очувчи реактив тизимлари билан ўққа тутилди. Бу ҳақда шаҳар ҳокимияти вакили маълум қилди.
Зарбалар шаҳар маъмурияти, Энергодарга кираверишдаги кўприк ва «Луч» подстанциясига тегган. Айтишларича, подстанцияга зарбадан кейин Энергодар бутунлай электрсиз қолган.
Аннексия қилинган Запорожье вилояти ҳокимияти вакили Владимир Рогов «РИА Новости» агентлигига Украина ҳарбийлари тунда Энергодардаги Запорожье атом электр станциясини эгаллаб олишга урингани ҳақида маълум қилди.
Жанглар бир неча соат, камида уч-уч ярим соат давом этди. Уларнинг қайиқдан тушишга уринишлари қайтарилди», — дейди Рогов.
«Тез орада Херсон учун жанг бошланади» — Херсон вице-губернатори
Украина армияси тез орада аннексия қилинган Херсонга қарши ҳужум бошлайди. Херсон вице-губернатори Кирилл Стремоусов тинч аҳолига минтақанинг ўнг қирғоқ қисмини тарк этишни қатъий тавсия қилмоқда.
«Бизда мавжуд маълумотларга кўра, Ғарб томонидан отлантирилган укронацистлар яқин орада Херсон шаҳрига ҳужум бошлайди», — деди Стремоусов ўзининг Telegram каналида.Унинг таъкидлашича, «Херсон шаҳрининг ҳамда Херсон вилоятининг ўнг қирғоқ қисми ўққа тутилиши истисно қилинмаяпти».
АҚШ, Британия ва Франция БМТ Хавфсизлик кенгашида Эрон дронларининг Россияга етказиб берилаётгани масаласини кўтаради
АҚШ, Буюк Британия ва Франция Бирлашган Миллатлар Ташкилоти Хавфсизлик кенгашининг бугун, 19 октябрда ўтказиладиган ёпиқ мажлисида Эроннинг Россияга қурол етказиб бериши масаласини кўтармоқчи, деб хабар берди Reuters.
Украина Россияни БМТ Хавфсизлик Кенгашининг Эрондан қурол импорт қилишга эмбарго қўйиш резолюциясини бузганликда айбламоқда. Нашрга изоҳ берган дипломатларнинг таъкидлашича, ҳар учала давлат ҳам Эрон дронларининг олиб кирилиши БМТ Хавфсизлик кенгашининг 231-резолюциясини бузиш, деб ҳисоблайди. Ғарб давлатлари вакиллари БМТ вакилидан Хавфсизлик Кенгаши аъзоларини ушбу масала бўйича хабардор қилишни сўрамоқда.
Бундан ташқари, Украина БМТ экспертларини Россия ушбу резолюцияни бузган ҳолда Украинадаги нишонларга ҳужум қилиш учун фойдаланаётган Эрон дронларни келиб текширишга чақирди.
Тоғли ҳудудларда қор ёғмоқда, Самарқанд ва Андижон йўлларини сув босди
Бугун Ўзбекистоннинг тоғли ҳудудларида қор ёғмоқда. Андижон ва Самарқанд йўлларини сув босди. Ижтимоий тармоқларда тарқалган видеолардан англашилишича, Самарқанд вилоятининг Булунғур туманидаги М39 автомобиль йўлида сув тошиши оқибатида ЙТҲлар содир бўлиши, шунингдек, автомобиллар тўхтаб қолиши юзага келган. Андижон шаҳрида сув босгани хабар берилган видеода эса шаҳар кўчаларида сув тошгани сабаб автомобиллар қатновида тирбандлик, муаммолар юзага келган.
Изоҳ (0)