Toshkentning Mirobod tumanida tez yordam xodimlari kaltaklangani haqida xabar berilgandi. Sog‘liqni saqlash vazirligi matbuot xizmatining ma’lum qilishicha, jabrlangan tez yordam xodimi “Sog‘liqni saqlash a’lochisi” ko‘krak nishoni bilan taqdirlandi.
Qayd etilishicha, poytaxtning Mirobod tumanida kaltaklanish oqibatida jiddiy tan jarohati olgan 103 haydovchisi I.H. Respublika shoshilinch tibbiy yordam ilmiy markazida tegishli muolajalarni olmoqda. Dastlabki tekshiruvlar natijasida unga bosh miya yopiq shikastlanishi, bosh miya chayqalishi, chap tizza sohasi yumshoq to‘qimalarining lat yeyishi tashxisi qo‘yilgan.
Sog‘liqni saqlash vaziri Behzod Musayev Respublika shoshilinch tibbiy yordam ilmiy markazining neyroxirurgiya bo‘limida davolanayotgan ushbu bemor holidan xabar oldi.
Afsuski, keyingi paytlarda o‘z xizmat vazifasini o‘tayotgan shifokor va hamshiralar, ayniqsa, tez yordam xodimlariga nisbatan kuch ishlatish holatlari tez-tez uchramoqda. Aholining sog‘ligini himoya qilishda o‘zini ayamay jon kuydirayotgan tizim xodimlariga tajovuz qilgan kimsalarga nisbatan qonunchilikda qat’iy javobgarlik belgilanishi ustida ishlanmoqda. O‘ylaymanki, qonunchilikka kiritilayotgan bu o‘zgarishlar soha vakillarining huquq va manfaatlarini himoya qilishda muhim asos bo‘ladi, — dedi Musayev.Vazir bemor bilan muloqot davomida unga tezroq sog‘ayishini tilab, kaltaklagan fuqaroga nisbatan qonunda belgilangan tartibda jazo belgilanishi uchun barcha zarur choralar ko‘rilishini ma’lum qildi.
Shuningdek, suhbat davomida bemor o‘z holidan xabar olgani kelgan vazirga minnatdorlik bildirib, 64 yoshga kirganiga qaramay, xalq salomatligi yo‘lida mehnat qilishdan charchamasligi, otasi tengi insonga, qolaversa, tibbiyot brigidasi tarkibida chaqiruv manziliga borgan shifokor ayolga qo‘l ko‘targan shaxs esa qonun oldida javob berishiga ishonishini ta’kidladi.
Muloqot so‘ngida o‘z xizmat vazifasiga mas’uliyat bilan yondashib, muhim daqiqalarda tezkorlik va professionallik sifatlarini namoyon etgan tez tibbiy yordam brigadasi xodimiga “O‘zbekiston Respublikasi sog‘liqni saqlash a’lochisi” ko‘krak nishoni berildi.
Bundan avval Toshkentning Yakkasaroy tumanidagi xonadonlardan birida o‘z xizmat vazifasini o‘tayotgan tez yordamda ishlovchi feldsher ayol kaltaklangandi. Sog‘liqni saqlash vazirligi mazkur holatni ham o‘z nazoratiga olgan.
Izoh (0)