Тошкентнинг Миробод туманида тез ёрдам ходимлари калтаклангани ҳақида хабар берилганди. Соғлиқни сақлаш вазирлиги матбуот хизматининг маълум қилишича, жабрланган тез ёрдам ходими «Соғлиқни сақлаш аълочиси» кўкрак нишони билан тақдирланди.
Қайд этилишича, пойтахтнинг Миробод туманида калтакланиш оқибатида жиддий тан жароҳати олган 103 ҳайдовчиси I.Ҳ. Республика шошилинч тиббий ёрдам илмий марказида тегишли муолажаларни олмоқда. Дастлабки текширувлар натижасида унга бош мия ёпиқ шикастланиши, бош мия чайқалиши, чап тизза соҳаси юмшоқ тўқималарининг лат ейиши ташхиси қўйилган.
Соғлиқни сақлаш вазири Беҳзод Мусаев Республика шошилинч тиббий ёрдам илмий марказининг нейрохирургия бўлимида даволанаётган ушбу бемор ҳолидан хабар олди.
Афсуски, кейинги пайтларда ўз хизмат вазифасини ўтаётган шифокор ва ҳамширалар, айниқса, тез ёрдам ходимларига нисбатан куч ишлатиш ҳолатлари тез-тез учрамоқда. Аҳолининг соғлигини ҳимоя қилишда ўзини аямай жон куйдираётган тизим ходимларига тажовуз қилган кимсаларга нисбатан қонунчиликда қатъий жавобгарлик белгиланиши устида ишланмоқда. Ўйлайманки, қонунчиликка киритилаётган бу ўзгаришлар соҳа вакилларининг ҳуқуқ ва манфаатларини ҳимоя қилишда муҳим асос бўлади, — деди Мусаев.Вазир бемор билан мулоқот давомида унга тезроқ соғайишини тилаб, калтаклаган фуқарога нисбатан қонунда белгиланган тартибда жазо белгиланиши учун барча зарур чоралар кўрилишини маълум қилди.
Шунингдек, суҳбат давомида бемор ўз ҳолидан хабар олгани келган вазирга миннатдорлик билдириб, 64 ёшга кирганига қарамай, халқ саломатлиги йўлида меҳнат қилишдан чарчамаслиги, отаси тенги инсонга, қолаверса, тиббиёт бригидаси таркибида чақирув манзилига борган шифокор аёлга қўл кўтарган шахс эса қонун олдида жавоб беришига ишонишини таъкидлади.
Мулоқот сўнгида ўз хизмат вазифасига масъулият билан ёндашиб, муҳим дақиқаларда тезкорлик ва профессионаллик сифатларини намоён этган тез тиббий ёрдам бригадаси ходимига «Ўзбекистон Республикаси соғлиқни сақлаш аълочиси» кўкрак нишони берилди.
Бундан аввал Тошкентнинг Яккасарой туманидаги хонадонлардан бирида ўз хизмат вазифасини ўтаётган тез ёрдамда ишловчи фелдшер аёл калтакланганди. Соғлиқни сақлаш вазирлиги мазкур ҳолатни ҳам ўз назоратига олган.
Изоҳ (0)