Sog‘liqni saqlash vazirligi matbuot xizmati sentabr oyi va oktabrning dastlabki o‘n kunligida tez yordamga O‘RVI (o‘tkir respirator virusli infeksiya) bo‘yicha qancha chaqiriq kelib tushgani bo‘yicha ma’lumot berdi.
Kuz fasli — gripp va o‘tkir respirator virusli infeksiyalarning tarqalishi uchun qulay palla. Ayniqsa, bu paytda kichik yoshli bolalar orasida nafas yo‘llarining turli yuqumli xastaliklari, xususan, O‘RVI ko‘p uchraydi.
Har qanday yuqumli kasallik mavsumiy bo‘lib, nafas yo‘llarining yuqumli xastaliklari, asosan, kuz-qish mavsumida va qisman bahor oylarida sezilarli darajada ortadi. Natijada 103 xizmatiga shamollash, gripp kabi o‘tkir respirator virusli infeksiyalarga chalinish bilan bog‘liq murojaatlar yilning boshqa davrlariga nisbatan biroz ko‘payadi, — deydi Respublika tez tibbiy yordam markazi bosh direktori Abduvoit Gafurov.Joriy yilning sentabr oyi va oktabrning dastlabki o‘n kunligida Respublika tez tibbiy yordam xizmatiga o‘tkir respirator kassaliklar bo‘yicha kelib tushgan chaqiriqlar asosida 132 ming nafardan ziyod bemorga sifatli tibbiy yordam ko‘rsatilib, ularning 9 ming 947 ta nafari gospitalizatsiya qilindi.
Taqqoslash uchun, o‘tgan yilning ayni shu davrida jami chaqiriqlar soni 150 ming 768 tani tashkil qilgan edi.
Sentabr oyida mamlakat bo‘yicha tez yordam xizmatiga O‘RVI bo‘yicha bo‘layotgan kunlik murojaatlar soni o‘rtacha 3 ming 200 tani tashkil qilgan bo‘lsa, eng ko‘p chaqiriq 25-sentabr sanasiga to‘g‘ri keldi va shu kuni 3 ming 829 ta murojaat qabul qilindi. Eng kam chaqiriq esa 8-sentabr kuni kuzatilib, ushbu sanada murojaatlar soni 3 ming 17 tani tashkil qildi.
Izoh (0)