Россия президенти Владимир Путин тожикистонлик ҳамкасби Эмомали Раҳмоннинг Марказий Осиёга собиқ СССР сифатида қарамаслик ҳақидаги чақириғига жавоб қайтарди. Бу ҳақда «ТАСС» ёзмоқда.
Путин СССРнинг миллий сиёсатига тўхталиб, совет даврида иттифоқ республикалари халқларининг маданияти ва иқтисодиётини ривожлантириш билан шуғулланилганини таъкидлади. Унинг фикрича, Марказий Осиё мамлакатларига, жумладан, иқтисодий ҳамкорлик соҳасида етарлича эътибор ва ҳурмат кўрсатилгани йўқ ва у бундан афсусда.
«Мен Эмомали Шарипович айтган гаплардан бошламоқчи эдим. Ҳа, ҳақиқатан ҳам, у ҳақ. Албатта, Совет Иттифоқида миллий тилларда китоблар нашр этилиб, театрлар очилди, маданият ва иқтисодиёт ривожланди», — дейди Путин.
«Аммо бугун, албатта, биз барча форматларимизни, шу жумладан, янги саммит форматини аниқ мазмун билан тўлдиришимиз керак», — дея давом этди Путин Россия ва Марказий Осиё мамлакатлари ўртасидаги иқтисодий ҳамкорлик ҳақида гапираркан.
Унинг сўзларига кўра, бу учрашувдан мақсад шунчаки гаплашиш эмас, балки минтақавий лойиҳаларни кўриб чиқиш, уларни мавжуд имкониятлар билан уйғунлаштириш ва нафақат икки томонлама, балки минтақавий миқёсда ҳам илгари суришдир. Путин бу орқали кўп масалаларни самарали ҳал қилиш мумкинлигини айтиб ўтди.
Раҳмон нима деганди?
Остонада бўлиб ўтган саммит давомида Тожикистон президенти Эмомали Раҳмон Россия президенти Владимир Путинга XXI асрда императорлик усулларига йўл қўйиб бўлмаслигини, Марказий Осиё давлатларига собиқ СССР сифатида қарамаслик, ҳурмат қилиш зарурлигини айтган.
«Ҳа, биз кичик халқмиз, биз 100—200 миллион эмасмиз, лекин бизда тарих, маданият бор, биз халқмиз, бизни ҳурмат қилишни хоҳлаймиз. Биз тиланчи эмасмиз. Бизда бой давлат бор. Владимир Владимирович, илтимосимиз шуки, Марказий Осиё давлатларига нисбатан собиқ иттифоққа нисбатан сиёсат юритилмасин. Биз олтин ўртани топиб, ҳар бир республика билан алоҳида ишлашимиз керак», — дейди Эмомали Раҳмон Остонадаги саммитда сўзлаган нутқида.
Унинг сўзларига кўра, Россия озиқ-овқат соҳасида МДҲ давлатлари билан ҳамкорлик қилади ва савдони ривожлантиради, лекин бунинг эвазига тенг муносабат кўрсатмайди.
«Биз сиз билан бирга Совет иттифоқи парчаланганига гувоҳ бўлдик. Ҳозир бўлгани каби кичик республикаларга, майда халқларга эътибор йўқлигига гувоҳ бўлдик. Анъаналар, урф-одатлар эътиборга олинмаган. Биз тараққиётни қўллаб-қувватламадик. Кеча сиз икки миллион ҳақида гапирдингиз (Россия Федерациясидаги Тожикистондан келган муҳожирлар). Сизга шуни айтмоқчиманки, икки миллиондан ортиқ фуқароларимиз Россия Федерациясига нафақат ишлаш, балки ўқиш, даволаниш учун ҳам боради», — деди Тожикистон президенти.
Шунингдек, У Марказий Осиё мамлакатлари ва Россиянинг қўшнилигига эътибор қаратиб, «ўзаро узоқлашиб бўлмаслигини» таъкидлаган.
Изоҳ (0)