SpaceX va Tesla kompaniyalari asoschisi Ilon Mask Rossiya yadro raketalari bilan 30 daqiqa ichida AQSH va Yevropani butunlay vayron qila olishi haqida yozdi.
“Rossiyada AQSH va Yevropani yadro raketalari bilan 30 daqiqada vayron qilish uchun imkoniyat bor va aksincha”, — deb yozdi milliarder o‘z Twitter’ida. “Hayratlanarli darajada ko‘p odamlar buni bilmaydi. Albatta, ularni qo‘llash tentaklik bo‘lgan bo‘lardi, lekin, umuman, bunday vaziyatda bo‘lishning o‘zi tentaklikdir”, — deya qo‘shib qo‘ydi u.
Ushbu postni u NATO 17-oktabr, dushanba kuni B-52 bombardimonchilari ishtirokida yadroviy mashg‘ulotlarni boshlashi haqidagi xabarni Twitter’ga joylagan va u holda “vaziyat yadroviy Armageddongacha borib yetishi” haqida fikr bildirgan foydalanuvchi, kanadalik biznesmen Aleksandr Torvillning postiga javoban yozdi.
Shuningdek, u oqilona fikrlaydigan hech bir odam yadro urushini boshlamasligini qayd etdi. “Bu mantiq bilan bog‘liq muammo shundaki, agar biz aytayotgan odamlar oqil bo‘lganida, birinchi o‘rinda urushning o‘zi bo‘lmasdi”, — dedi u.
Ilon Mask Ukrainadagi urushga qanday munosabatda?
3-oktabr kuni Ilon Mask Rossiya va Ukraina o‘rtasida tinchlikka erishish uchun o‘zining to‘rt bandli ssenariysini taklif qilgandi, ulardan biriga ko‘ra Qrim Rossiyaniki deb tan olinishi kerak. Kreml uning g‘oyalarini ijobiy deb baholadi, Kiyev esa tadbirkorni tanqid qildi. Mask Ukrainani qo‘llab-quvvatlashini, lekin jahon urushini istamasligini aytdi. Siyosatshunos Yan Bremmerning ta’kidlashicha, Ilon Mask mojaroni hal qilish rejasini e’lon qilishdan oldin Vladimir Putin bilan gaplashgan. Kreml ham, tadbirkorning o‘zi ham buni rad etdi.Maskning “reja”sini izohlar ekan, Ukraina sobiq elchisi Andrey Melnik unga nisbatan so‘kinish iborasini qo‘lladi va “tuyog‘ini shiqillatish”ni maslahat berdi.
Amerikalik milliarder esa shundan keyin Ukraina uchun Starlink internetini moliyalashtirishni to‘xtatishga qaror qildi.
Mavzuga doir:
Izoh (0)