2022-yilning 6-oktabrida O‘zbekistondagi eng yirik avtomobil ishlab chiqaruvchisi — UzAuto Motors’ning IPO’si start oldi.
O‘zbekistonda bu yirik davlat kompaniyasi tomonidan birinchi ommaviy taklif (IPO) hisoblanadi.
Kompaniya jismoniy va yuridik shaxslar sotib olishi mumkin bo‘lgan 5 foizgacha aksiyalarini “Toshkent” fond birjasiga joylashtiradi.
IPO nima va u nega o‘tkaziladi?
IPO (Initial Public Offering) — bu kompaniya aksiyalarining fond birjasida birinchi joylashtirilishi.
Aksiya — bu korxona ishlab chiqaradigan qimmatbaho qog‘oz. Aksiyalarni sotib olgan aholi vakillari yoki kompaniyalar biznesga sherik bo‘lib qolishadi.
Kompaniya uchun IPO — bu manfaatli shartlarda yirik investitsiyalarni jalb qilish usuli.
Masalan, 2011-yilda NASDAQ Amerika fond birjasida aksiyalarni birinchi marta ommaviy joylashtirish natijasida “Yandeks” kompaniyasi 1,3 mlrd dollar miqdordagi mablag‘ni jalb qilishga muvaffaq bo‘ldi.
Moliyaviy manfaatlardan tashqari, korxona o‘z obro‘sini mustahkamlaydi va keng tan olinadi.
Tadbirda Moliya vaziri o‘rinbosari Odilbek Isoqov, “O‘zavtosanoat” boshqaruvi raisi Shavkat Umurzoqov va UzAuto Motors’ning bosh direktori Bo Andersson ishtirok etdi.
UzAuto Motors aksiyalarini ommaviy joylashtirish va xususiy sektorni investitsiyalarga jalb etish kompaniyaning strategik rivojlanishi uchun muhim qadamdir. Kompaniyaning so‘nggi yillarda jadal rivojlanishi va ko‘plab yutuqlari uni ishonchli sarmoyaviy hamkorga aylantirdi, — dedi Shavkat Umurzoqov.
Uning ta’kidlashicha, UzAuto Motors zarar ko‘ruvchi va subsidiyalangan kompaniyadan xorijiy mamlakatlarda ishlab chiqarishni yo‘lga qo‘ygan eng yirik va eng daromadli avtomobil ishlab chiqaruvchi korxonaga aylandi.
Joriy yilning iyul oyida UzAuto Motors’ning anderrayteri tender natijalariga ko‘ra Freedom Broker investitsiya kompaniyasi tomonidan tanlangan.
Tahlilchilar IPO’dan so‘ng avtomobil ishlab chiqaruvchisi aksiyalari narxi oshishini kutishmoqda, chunki bu ishonchli va foyda keltiruvchi korxona, — deya izoh berdi, Freedom Broker ijrochi direktori Yevgeniy Mojeyko.
Boshqa mamlakatlarda ham yirik milliy kompaniyalarning qimmatli qog‘ozlari investitsiya vositasi sifatida yaxshi ishlaydi va O‘zbekistonda ham samarali bo‘lishi kutilmoqda.
Tahlilchilarning prognozlari avtomobil ishlab chiqaruvchi korxonaning iqtisodiy ko‘rsatkichlariga asoslanadi — 2020-yildan buyon UzAuto Motors O‘zbekistondagi eng yirik soliq to‘lovchilar o‘nligidan joy oldi.
Kompaniyaning 2021-yildagi sof daromadi 166 million dollarni tashkil etdi, ishlab chiqarish hajmi 235 000 ta avtomobilni tashkil etdi.
Joriy yilda ishlab chiqarish hajmini 340 ming dona avtomobilgacha oshirish rejalashtirilgan, bu esa mos ravishda sof foydaning sezilarli darajada ko‘payishiga olib keladi.
2026-yilga kelib daromad 2021-yilga nisbatan 2 baravar oshishi kutilmoqda.
UzAuto Motors kompaniyasining jozibadorligi xalqaro kapital bozorida uning qimmatli qog‘ozlariga bo‘lgan qiziqishni tasdiqlaydi.
2021-yilda avtomobil ishlab chiqaruvchisi London fond birjasiga 300 million dollarlik yevroobligatsiyalarni joylashtirgan edi. Shunda talab taklifdan 5 barobar oshib ketgan.
Izoh (0)