2022 йилнинг 6 октябрида Ўзбекистондаги энг йирик автомобиль ишлаб чиқарувчиси — UzAuto Motors’нинг IPO’си старт олди.
Ўзбекистонда бу йирик давлат компанияси томонидан биринчи оммавий таклиф (IPO) ҳисобланади.
Компания жисмоний ва юридик шахслар сотиб олиши мумкин бўлган 5 фоизгача акцияларини «Тошкент» фонд биржасига жойлаштиради.
IPO нима ва у нега ўтказилади?
IPO (Initial Public Offering) — бу компания акцияларининг фонд биржасида биринчи жойлаштирилиши.
Акция — бу корхона ишлаб чиқарадиган қимматбаҳо қоғоз. Акцияларни сотиб олган аҳоли вакиллари ёки компаниялар бизнесга шерик бўлиб қолишади.
Компания учун IPO — бу манфаатли шартларда йирик инвестицияларни жалб қилиш усули.
Масалан, 2011 йилда NASDAQ Америка фонд биржасида акцияларни биринчи марта оммавий жойлаштириш натижасида «Яндекс» компанияси 1,3 млрд доллар миқдордаги маблағни жалб қилишга муваффақ бўлди.
Молиявий манфаатлардан ташқари, корхона ўз обрўсини мустаҳкамлайди ва кенг тан олинади.
Тадбирда Молия вазири ўринбосари Одилбек Исоқов, «Ўзавтосаноат» бошқаруви раиси Шавкат Умурзоқов ва UzAuto Motors’нинг бош директори Бо Андерссон иштирок этди.
UzAuto Motors акцияларини оммавий жойлаштириш ва хусусий секторни инвестицияларга жалб этиш компаниянинг стратегик ривожланиши учун муҳим қадамдир. Компаниянинг сўнгги йилларда жадал ривожланиши ва кўплаб ютуқлари уни ишончли сармоявий ҳамкорга айлантирди, — деди Шавкат Умурзоқов.
Унинг таъкидлашича, UzAuto Motors зарар кўрувчи ва субсидияланган компаниядан хорижий мамлакатларда ишлаб чиқаришни йўлга қўйган энг йирик ва энг даромадли автомобиль ишлаб чиқарувчи корхонага айланди.
Жорий йилнинг июль ойида UzAuto Motors’нинг андеррайтери тендер натижаларига кўра Freedom Broker инвестиция компанияси томонидан танланган.
Таҳлилчилар IPO’дан сўнг автомобиль ишлаб чиқарувчиси акциялари нархи ошишини кутишмоқда, чунки бу ишончли ва фойда келтирувчи корхона, — дея изоҳ берди, Freedom Broker ижрочи директори Евгений Можейко.
Бошқа мамлакатларда ҳам йирик миллий компанияларнинг қимматли қоғозлари инвестиция воситаси сифатида яхши ишлайди ва Ўзбекистонда ҳам самарали бўлиши кутилмоқда.
Таҳлилчиларнинг прогнозлари автомобиль ишлаб чиқарувчи корхонанинг иқтисодий кўрсаткичларига асосланади — 2020 йилдан буён UzAuto Motors Ўзбекистондаги энг йирик солиқ тўловчилар ўнлигидан жой олди.
Компаниянинг 2021 йилдаги соф даромади 166 миллион долларни ташкил этди, ишлаб чиқариш ҳажми 235 000 та автомобилни ташкил этди.
Жорий йилда ишлаб чиқариш ҳажмини 340 минг дона автомобилгача ошириш режалаштирилган, бу эса мос равишда соф фойданинг сезиларли даражада кўпайишига олиб келади.
2026 йилга келиб даромад 2021 йилга нисбатан 2 баравар ошиши кутилмоқда.
UzAuto Motors компаниясининг жозибадорлиги халқаро капитал бозорида унинг қимматли қоғозларига бўлган қизиқишни тасдиқлайди.
2021 йилда автомобиль ишлаб чиқарувчиси Лондон фонд биржасига 300 миллион долларлик еврооблигацияларни жойлаштирган эди. Шунда талаб таклифдан 5 баробар ошиб кетган.
Изоҳ (0)