Dehqonobod tumanining chekka qishloqlarida konteyner tibbiyot maskanlari ish boshladi (foto)

Qashqadaryo viloyatining Dehqonobod tumanidagi chekka qishloqlarda konteyner tibbiyot maskanlari ish boshladi. Bu haqda “Daryo”ga tuman hokimligi axborot xizmati xabar berdi.

Ma’lum qilinishicha, konteyner tibbiyot maskanlari tumanning 6 ta qishlog‘ida ish boshlagan.

“Ana shunday tibbiyot maskanlarining to‘rttasi kuni kecha ishga tushdi. Ulardan biri tumanning ‘Qo‘rg‘ontosh’ mahalla fuqarolar yig‘ini O‘smondara qishlog‘ida, keyingisi tuman markazidan 200 km uzoqlikdagi ‘Oybek’ mahallasining Archazor aholi maskanida, shuningdek ‘Chambil’ mahallasining Avjun qishlog‘ida hamda Darxon qishloqlarida ish boshlagan”, — deydi axborot xizmati xodimi Murodjon Amirov.

Tuman tibbiyot birlashmasi boshlig‘i Shavkat Amirovning ma’lumot berishicha, bunday tibbiyot maskanlarida ham barcha imkoniyatlar yaratilib, alohida tibbiyot xodimlari biriktirilmoqda.

“Inson qadri ulug‘lanayotgan yurtda insonlar salomatligi birinchi o‘rinda bo‘lishi shart. Tuman markazidan uzoqda joylashgan bu hududlar aholisiga sifatli tibbiy yordam ko‘rsatiladi. Bunday ishlarimizni davom ettiramiz”, — deydi tuman hokimi Zoir Aliqulov.