Қашқадарё вилоятининг Деҳқонобод туманидаги чекка қишлоқларда контейнер тиббиёт масканлари иш бошлади. Бу ҳақда «Дарё»га туман ҳокимлиги ахборот хизмати хабар берди.
Маълум қилинишича, контейнер тиббиёт масканлари туманнинг 6 та қишлоғида иш бошлаган.
«Ана шундай тиббиёт масканларининг тўрттаси куни кеча ишга тушди. Улардан бири туманнинг ‘Қўрғонтош’ маҳалла фуқаролар йиғини Ўсмондара қишлоғида, кейингиси туман марказидан 200 км узоқликдаги ‘Ойбек’ маҳалласининг Арчазор аҳоли масканида, шунингдек ‘Чамбил’ маҳалласининг Авжун қишлоғида ҳамда Дархон қишлоқларида иш бошлаган», — дейди ахборот хизмати ходими Муроджон Амиров.
Туман тиббиёт бирлашмаси бошлиғи Шавкат Амировнинг маълумот беришича, бундай тиббиёт масканларида ҳам барча имкониятлар яратилиб, алоҳида тиббиёт ходимлари бириктирилмоқда.
«Инсон қадри улуғланаётган юртда инсонлар саломатлиги биринчи ўринда бўлиши шарт. Туман марказидан узоқда жойлашган бу ҳудудлар аҳолисига сифатли тиббий ёрдам кўрсатилади. Бундай ишларимизни давом эттирамиз», — дейди туман ҳокими Зоир Алиқулов.
Изоҳ (0)