O‘zbekiston tashqi ishlar vaziri Vladimir Norov Tojikiston tashabbusi bilan BMT Bosh assambleyasining 77-sessiyasi doirasida Nyu-York shahrida tashkil etilgan “Erib borayotgan kriosfera: yerosti suvlarini saqlash va suv resurslarini boshqarish bo‘yicha tahdidlar” mavzusidagi yuqori darajadagi yig‘ilishda ishtirok etdi.
TIV ma’lumotiga ko‘ra, tadbirda muzliklarni muhofaza qilish sohasida xalqaro hamkorlikni mustahkamlash masalalari muhokama qilindi. Suv resurslaridan oqilona foydalanish va boshqarish sohasida innovatsion usullarni joriy etish bo‘yicha hamkorlikni faollashtirish yo‘llari ko‘rib chiqildi.
Mamlakat delegatsiyasi rahbari, tashqi ishlar vaziri Vladimir Norov yig‘ilish ishtirokchilari e’tiboriga O‘zbekistonda Shavkat Mirziyoyev rahbarligida global iqlim o‘zgarishi oqibatlari yumshatish bo‘yicha olib borilayotgan ishlar to‘g‘risidagi ma’lumotlarni havola etdi.
O‘zbekiston rahbarining SHHT Iqlim kengashini tashkil etish, iqlim moslashuvi loyihalarini ilgari surish, cho‘llanish va yer degradatsiyasiga qarshi kurashda hamkorlik samaradorligini oshirishga qaratilgan tashabbusiga alohida e’tibor qaratildi.
Vladimir Norov o‘z nutqida Orol muammosiga alohida to‘xtaldi. O‘zbekiston rahbari tashabbusi bilan Orol dengizining qurigan tubida himoya yashil maydonlarni yaratish, shuningdek, Orolbo‘yi mintaqasini ekologik innovatsiyalar va texnologiyalar zonasiga aylantirish bo‘yicha amalga oshirilayotgan chora-tadbirlarning aniq natijalari haqida xabar berildi.
Ishtirokchilar 2022-yil Nukus shahrida o‘tkaziladigan Birinchi Orolbo‘yi forumiga taklif qilindi. Orolbo‘yi mintaqasi uchun ko‘p sheriklik trast fondi faoliyatini moliyaviy qo‘llab-quvvatlashning muhimligi ham e’tirof etildi.
Izoh (0)