Актёр, клипмейкер Нуримон Султонхўжаев исмини ўзгартиргани, нима сабабдан клипларида ўзи суратга тушиши, энг қиммат нархдаги клипларини қайси хонанданларга ишлаб бергани, Маҳмуд Намозовнинг «Кўза» таронасинига клип суратга олиш жараёнлари, қайси клиплари «куйиб кетгани» ва уларни қайта суратга олгани ҳақида гапирди.
Нуримон Султонхўжаев исмини ўзгартиришига нима сабаб бўлгани ҳақида
«Ўзим ҳам ҳайрон қолдим, тақдир экан. Биринчи 3-4 та илмли инсонлардан Наримон эмас, Нуримон деб эшитдим, кейин шу нарса тушимга ҳам кириб чиқди. Шунақа бўлиши керак экан деб, туғилганлик ҳақида гувоҳномамни, паспортимни, ҳужжатларимни ўзгартирдим. Наримон деб чақиришлари мумкин, лекин менга кўпроқ Нуримон исми тўғри келар экан. Аниқ бирор нарсани сабаб қилиб кўрсата олмайман.
Исм инсоннинг ҳаётида катта рол ўйнайди, қачондир битта ҳарф ҳам тақдирни ўзгартириши мумкин экан. Кейинчалик тушуниб етдим, исмимнинг маъноси ‘Иймон нури’ бўларкан», — дейди клипмейкер.
Клипмейкер нима сабабдан клипларида ўзи суратга тушиши тўғрисида
«Клипда ўзим ҳам суратга тушишим ҳақида таклиф Улуғбек Раҳматуллаевнинг ‘Бемор’ клипида бўлган. Клипдаги воқеаларни хонандага айтиб бераётган вақтим, худди клипдагидек мен бунақа клип олмайман деб айтди. Кейин фикрларимни айтаётган вақтим, клипда ўзим ҳам суратга тушишим ҳақида таклиф берди. Шу билан клип суратга олинди. Кейин бошқа клиплардан ҳам шу бўйича буюртма олдим. ‘Ўзингиз суратга тушмасангиз, клип олдирмайман’, деганлар ҳам бўлди. Бир хил жойларда ҳақиқатан ҳам ўзимни кўраман ва суратга тушишимни айтаман», — дейди Нуримон Султонхўжаев.
Нуримон Султонхўжаев энг қиммат нархдаги клипларини қайси хонанданларга ишлаб бергани ҳақида
«Муниса Ризаеванинг ‘Секин-аста’, яқинда суратга олинган Озод Хуррамовнинг ‘Мандарин’ таронасига ишланган клипи ижодимдаги энг қиммат клиплар.
Шундай хонандалар борки, компаниялар учун олинадиган видероликлар билан бир хил нарх тўлайди. Айрим компаниялар эса видеони вақтини камайтириб камроқ пул тўлайди. Бироқ реклама роликлари ижод эмас. Бундай роликларини ҳам қилиб туриш керак, ўзига хос пунктуалликни ушлаб туради. Реклама ролиги ҳам осон нарса эмас, 30 секундда инсонларнинг миясига кўп маълумотни етказиш керак бўлади», — дейди клипмейкер.
Маҳмуд Намозовнинг «Кўза» таронасинига суратга олинган клип жараёнлари тўғрисида
«Бу қўшиқнинг хит бўлиши ёки бўлмаслигини билмадим, лекин бу қўшиқ чиқмаган ҳам бўлар эди. Маҳмуд Намозов уни айтиб ‘беркитиб’ қўйган экан. Бир куни у инсоннинг укаси, администратори Ўктам ака олдимга келган. Ноутбук билан дискда шу қўшиқни олиб келишган. ичида яна 3-4 та қўшиқ ҳам бўлган. «Кўза»ни эшитдим, шу қўшиққа клип олайлик деб айтдим. Чунки қўшиқнинг боши инсонни илҳомлантириб қўйди. Кейин Ўктам ака: ‘Маҳмуд ака бу қўшиқдан уяляпти, айтгиси келмаяпти’, деб айтди.
Маҳмуд ака сезган экан, у қўшиқни уйдан чиқиб кетиб оёқ кийимларини боғлаётган вақтда илҳоми келиб ёзган экан. Кейин қўшиқни айтиб улфатларига эшиттирганида ёшинг катта шунақа қўшиқ айтма дейишган. Маҳмуд ака олдимга келганидан кейин: ‘Бу қўшиқнинг зўрлигини билардим, шунга клип олинғ, деб айтди. Шу билан охиригача бўлиб кетди», — Нуримон Султонхўжаев.
Клипмейкер қайси клиплари «куйиб кетгани» ва қайта суратга олгани ҳақида
«Менда ҳам материал ‘куйиб’ кетиб, қайта суратга олган клипларим бор. Машҳурларидан устозим Баҳодир Йўлдошев билан Санкт-Петербургда «Чайнваэм»нинг клипини олганмиз, ўшанда клипни ярим материали ёниб кетиб чиқара олмаганмиз. Ҳеч ким уни қайта тиклай олмаган, қайтадан олганмиз. Ўзимизнинг гонорардан тикиб, клипни олиб топширганмиз. Доимий эмас, умумий икки марта бўлган экан. Шу дарс бўлган, клипни олиб бўлгандан кейин дарров нусха қилдираман. Ҳаёт тажрибаси, суратга олиш тугадими, тез нусхалаш керак», — дейди клипмейкер.
Мавзуга доир:
Изоҳ (0)